DYSS Super Radyo ug BJMP nilusad og programa

CEBU, Philippines – Gipahigayon kagahapon sa buntag ang pagpirma sa memorandum of agreement (MOA) tali sa DYSS Super Radyo Patrol ug Bureau of Jail Management and Penology (BJMP).

Si BJMP regional director Chief Superintendent Paulino Moreno ug Bobby Nalzaro, program director sa RGMA ang nipirma sa maong MOA kabahin sa ilusad nga programa nga “PAGPAKABANA” diin sulod kini sa usa ka oras aron mahatagan og kahigayonan ang katawhan sa pagpadayag sa ilang mga nasinating problema sa serbisyo sa BJMP.

Ang maong programa i-aired kini sa DYSS Super Radyo sa matag adlaw nga Domingo sa alas 2:30 hangtud sa alas 3:00 sa hapon.

Ang RGMA nitanyag og time slot sa BJMP nga libre diin ang BJMP mao’y mo-assign og mga personnel nga mahimong guest sa programa.

Kagahapon gipahigayon usab sa BJMP ang paglusad sa Feedback and Referral Mechanism nga programa diin tumong niini nga ma-monitor ang maong iregularidad sa ilahang mga personnel.

Giingong usa kini sa paagi nga ang publiko makapadayag og reklamo kong sila nakasinati og pagpangabuso sa mga personnel sa BJMP.   (Nichole Alexis A. Abas, USJ-R Intern/BDB)

Wanted sa kasong rape nasikop

Usa sa most wanted person sa kapolisan sa Lungsod sa Asturias tungod sa kasong pagpanglugos ang nadakpan niadtong Martes sa buntag diha sa Barangay Agtugop sa maong lungsod human sa kapin sa 14 ka tuig nga pagtago-tago.

Ang suspetsado nga si Braulio Casas Pintor, 47-anyos, residente usab sa maong dapit nasikop sa kapolisan pinasikad sa warrant of arrest sa kasong rape.

Si  Police Chief Inspector Stephen Amamag-id, hepe sa Asturias Police Station nibutyag nga niadto pang Oktubre 7, 2004 nigawas ang maong warrant batok sa suspetsado nga giluwatan ni Regional Trial Court (RTC) Judge Cesar Estrera sa Branch 29 sa Dakbayan sa Toledo.

Matud ni Amamag-id nga nasigpatan ang maong suspek nga nibalik diha sa lungsod diin nagtuo kini nga nakalimtan na ang iyang kaso tungod sa kadugay na sa panahon ang nakalabay.

Giingong niadtong tuig 2004 si Pintor gipasanginlang nanglugos kini og usa ka menor de edad ug human sa maong hitabo ang suspetsado nagtago-tago kini.  (/BDB)(BANAT NEWS)