Mga mangunguot wala makapamiktima diha sa Basilica
CEBU, Philippines — Ang kapolisan sa Dakbayan sa Sugbo nihangop nga walay natala nga biktima sa pagpanguot ug mga nawad-an og mga butang diha sa vicinity sa Basilica Minore del Santo Niño sukad sa pagbukas sa mga kalihukan alang sa kapistahan sa balaang bata ug malaumon nga walay mga mabiktima hangtud mahuman ang pista.
Kini ang gibutyag sa direktor sa Cebu City Police Office Senior Superintendent Royina Garma nga nahinabi sa Banat News. Matud ni Garma nga sukad sa pagbukas sa misa novena hangtud kagahapon wala pa siya’y nadawat nga taho nga adunay nabiktima sa pagpanguot sa vicinity sa Basilica ug sa silingan nga lugar ug malaumon siya nga ilaha kining mamentenar.
Gipasigarbo ni Garma nga nakatabang ang ilang kampaniya alang sa hugot nga seguridad ug ang pagkamabinantayon sa katawhan.
Ang mga badlongon maglisod kini og lighot sa pagpamiktima tungod sa presensiya sa kapolisan.
Awhag ni Garma sa mga deboto nga dili makiglalis sa kapolisan ug mosunod nalang sa gipatuman nga pamaagi tungod kaya lang kini sa seguridad.
Subli usab nga gipahimangnoan ang katawhan nga dili himuon ang ilang kaugalingon nga mahimong subject sa mga badlongon sa katilingban o dili maghatag og motibo nga mahimong biktima. BDB, (BANAT NEWS)
- Latest