CSBT temporaryong isirado alang sa Sinulog
CEBU, Philippines – Sugod sa alas 8:00 sa gabi sa Enero 19, 2019 temporaryong pasirad-an ang Cebu South Bus Terminal alang sa pagpangandam sa Sinulog grand parade sa Enero 20, 2019.
Si Jonathan “Joy” Tumulak, manager sa CSBT nagkanayon nga gikan sa alas 8:00 sa gabii hangtud alas 10:00 sa gabii ang dawaton na lang nila sa terminal mao ang mga bus nga moabot gikan sa habagatan ug kadtong mga bus nga makabiyahe pa nianang orasa apan dili na sila modawat og pasahero.
“Sa Sabado, ang amo lang dawaton ang kadto lang last trip nga arrivals pero dili na modawat og pasahero para sa first trip nga alas12:00 tungod kay pagka-alas 12:01 sa Sunday magsugod na og sirado ang CITOM sa Sinulog mag-abot-abot na pod ang mga contingent ang mga floats”, matud ni Tumulak.
Adto sa dalan El Pardo sa South Road Properties (SRP) temporaryong ibalhin ang terminal.
Buksan og balik ang terminal pagka alas 8:00 sa gabii sa Enero 20, adlaw nga Domingo human sa Sinulog grand parade o magdepende sila sa “go signal” sa CTTO kon kanus-a buksan ang dalan diha sa N. Bacalso.
Matud ni Tumulak nga sa ilang pagbukas sa terminal kontrolahon nila ang volume sa mga pasahero sulod sa CSBT alang sa seguridad.
Si Tumulak nipahibawo usab nga ang Land Transportation Franchising and Regulatory Board (LTFRB) moisyu kini og special permits sa mga pinili nga PUJs nga mohakot sa mga pasahero atol sa Sinulog grand parade. (/BDB)(BANAT NEWS)
- Latest
