Malimpyohan kaha ang ngalan ni Rama?

CEBU, Philippines — Hangtud kanus-a magpadayon si kanhi Cebu City Mayor Michael Rama sa iyang tinguha paglimpyo sa iyang pangalan human kini gipasanginlan nga drug protector?

Ang maong pangutana anaa gihapon sa hunahuna ni Rama ilabi na nga wala pa niya makita ang kahayag sukad sa iyang unang lakang aron malimpyohan ang iyang ngalan.

Kapin duha ka tuig na ang nakalabay dihang si Presidente Rodrigo Duterte mihingan kaniya nga lakip sa narcopoliticians sa nasud.

Sukad niadto, si Rama nihimo na og mga lakang aron makahinabi ang presidente aron mapapas ang iyang ngalan sa listahan. Gani niadto kini sa buhatan sa Philippine National Police ug Philippine Drug Enforcement Agency diin misumetir siya og importanteng dokumento nga magmapatuod nga siya dili drug protector.

Sa ikaduhang higayon si Rama miadto sa ulohang buhatan sa PDEA sa panghinaut nga kini makakuha og positibong tubag. Apan sa kasamtangan, wala pay tubag ang maong buhatan.

“… as I have said huwat lang gyud ta sa PDEA kay tanan man agencies padong man nila, mao nay akong nahibaw-an nga maoy ilang proseso”, asoy ni Rama.

Nahatagan og higayon si Rama nga maistorya si Duterte labot niini dihang mitambong siya sa Rotary Club Convention sa Davao City.

Sigon ni Rama nga wala siya magdahum mahimamat ang presidente ug matud pa pinaagi ni kanhi assistant ni Duterte nga si Christopher “Bong” Go nahatagan siya og oportunidad nga makapagawas sa iyang habig.

“Naka-istorya gyud mi by chance, it was not an appointment… nangumusta ko ni Bong Go… Eventually ingon siya nako sige Sir aria ko… to cut the story short we were able have an exchange”, dugang sa kanhi Mayor. Sa maong higayon wala siya matud pa mihangyo kang Duterte nga tangtangon ang iyang ngalan, ang importante alang niya mao nga napahibawo kini niya siya dili drug protector.

Nanghinaut si Rama nga ang paghingan kaniya nga drug protector dili makaapektar sa iyang kandidatura pagka-Bise Mayor sa umaabot nga eleksiyon karong Mayo.

Siya maoy running mate ni incumbent Vice Mayor Edgardo Labella nga modagan pagka-Mayor sa siyudad ubos sa Partido Barug PDP-Laban. (/DILT)(BANATNEWS)