Mga batan-on gisentro sa mensahe ni Palma

CEBU, Philippines – Mensahe ni Archbishop Jose Palma panahon sa pasko nagsentro sa mga kabatan-onan ug naghagit usab kini nga magpakabana ngadto sa ilang isigka batan-on ilabi na kadtong mga natumpawak sa mga kaalautan.

Hagit ni Palma sa mga kabatan-onan nga magserbisyo sa ilang isig ka batan-on sa pagduol ug pagpangita sa ilang isig ka batan-on nga nisimang ngadto sa lain nga dalan.

Matud ni Palma bag-o pa nga gitapos ang year of the clergy and consecrated person niadtong Nobiyembre 25 ug gibuksan usab ang year of the youth ubos sa tema nga  “beloved, gifted and empowered” diin pagpangandam kini alang sa ika-500 ka tuig sa Kristiyanismo.

Malaumon si Palma nga niining panahon sa mga kabatan-onan kinahanglan susama sila sa balaan nga bata nga mapaubsanon ug bukas sa kabubut-on sa Dios.

Si Palma nipaabot sa iyang panimbaya sa usa ka malipayon nga pasko ug mapasalamaton sa tanang grasya nga gihatag sa Ginoo nga puno sa pagdayeg ug pagbati sa pagkatawo niini.

Awhag ni Palma dili lang sa mga batan-on sa pangidaron apan lakip sa ilang pagserbisyo nga bisan sa unsang mga klase-klase nga pagsuway dili mawagtangan og pagsalig tungod kay anaa ang kalipay. —/BDB (BANAT NEWS)