Osmeña moapela sa desisyon sa SC

CEBU, Philippines – Mohangyo pag-usab si Cebu City Mayor Tomas Osmeña sa konseho sa siyudad nga mopahigayon og laing special session niining buwana kini aron paghatag og pagtugot kaniya nga moapelar sa desisyon sa Korte Suprema labot sa operasyon sa Angkas.

Si Osmeña nipasabot nga proyoridad niya ang mga sumakay ug nihangyo siya sa konseho nga mopahigayon og laing special session aron siya hatagan og pagtugot nga makaapelar ngadto sa Korte Suprema kabahin sa maong isyu.

Niining ulahi lang, ang kagamhanan sa siyudad nitagana og P15 milyones nga emergency assistance sa tanang motorcycle-for-hire sa siyudad aron pagtabang sa mga habal-habal driver ilabi na kadtong mga Angkas driver nga apektado sa desisyon sa Korte Suprema.

Ang siyudad dunay 6,000 ka rehistradong habal-habal ug gipaabot nga matag usa kanila makadawat unya og tag usa ka sakong bugas.

Hinuon ang executive department nag-andam na sa executive order diin nakalatid didto ang pag-verify ug pag-evaluate sa qualified nga mga habal-habal driver nga makadawat og usa ka sakong bugas.

Si executive assistant to the mayor Francisco Fernandez nagkanayon nga posibleng karong semanaha ipagawas ang executive order diin paningkamutan nila nga ang tabang mahatag ngadto sa mga habal-habal driver sa dili pa ang pasko.

Makig-alayona ng siyduad sa National Food Authority aron masiguro ang paspas nga transaction sa pag-order og bugas. (/BDB)(BANAT NEWS)