Inmates sa CCJ makagawas na

CEBU, Philippines – Dul-an sa 200 ka priso sa Cebu City Jail nga miagi sa Plea Bargaining Agreement ang posibleng makagawas na karong tuiga human sila gipaubos sa Brief Intervention-Alcohol, Smoking, Substance Involvement nga gipangulohan mismo ni Jail Supt. Renante Rubio ug mga kaubanan.

Sila si Rubio nga mipaubos og seminar sa Department of Health (DOH) sa tinguha nga mamenusan ang ihap sa priso sa CCJ miingon nga adunay 1,800 capacity ang city jail apan karon miabot na kini ngadto sa 5,500 diin 85 porsiyento niini adunay kaso sa ilegal nga drugas.

Human nila makita nga adunay problema sa proseso sa pagpadrug test ug exams sa mga mi-apply sa Plea Bargaining Agreement kay pila ra ni ka slots, nangita sila og paagi aron matabangan ang maong mga priso.

Gibutyag ni Rubio nga human sa ilang tigum, nakapahigayon sila og drug test sa dul-an 200 ka mga inmates ug mohimo sila og report labot sa drug test nga ilang iduso kang Dr. David Baron, pangulo sa DOH Argao Rehabilitation Center.

Si Baron na maoy mo-certify ug moduso sa korte ug magpaabot nalang sila og release order.

Matud ni Rubio nga tumong gyud iya nga mamenusan ang mga inmates kay daghan ang nagtuo nga wala silay gihimo.

Sa pagka karon 1,470 ang mipaubos sa naasoy nga programa.

Dugang ni Rubio nga kadtong mga inmates nga miapil sa programa nga gihimo sa Surrender to God Program gihatagan niya og Good Conduct Time Allowance.

Ang DOH maoy mihatag og mga drugtest kit sa CCJ alang sa maong kalihukan. (/DILT)(BANAT NEWS)