Upat patay sa drug bust

CEBU, Philippines – Upat ka gipasanginlang drug personalities ang patay human nisukol sa kapulisan atol sa buy bust operation sa managlahing Barangay sa Dakbayan sa Talisay kagahapon.

Sa unang operasyon alas 3:55 sa kaadlawon sa Barangay Bulacao nga gihimo sa kapulisan sa Siyudad sa Talisay. Ang napatay mao sila si Rodel Nacario ug si Kevin Baguio nga gikatahong pulos nanganti nga mopatay og polis.

Si Supt. Marlu Conag, pangu sa kapulisan sa maong dakbayan niingon nga nakabantay ang duha nga polis ang ilang gikasabot ug daling nipabuto sa ilang mga armas.

Pagbawos sa mga operatiba, nahagba ang duha hangtud nga nakabsan sa ilang kinabuhi. Nakuhaan sila og dagko, medium ug gagmay nga paketeng gidudahang shabu ug ingon man .38 ug .357 nga revolvers.

Matud pa ni Conag nibuhi og pamahayag ang duha nga andam silang mopatay og polis. Ang duha giingong kagrupo sa mga drug personalities nga una  nang napatay sa kapolisan sa engkwentro didto sa Barangay Maghaway sa miaging buwan.

Samtang mga alas 7:45 sa buntag, napatay sab ang magsuong durugista sa mga sakop sa Provincial Intelligence Branch (PIB) sa Cebu Provincial Police Office (CPPO) didto sa Sitio Manguilamon, Barangay Jaclupan.

Ang magsuong napatay mao sila si Rodrigo ug Noel Alvarez.  Matud pa ni Sr. Insp. Alejandro Batobalonos sa PIB, tulo ka semana nilang gipanid-an ang duha human sila nakadawat og report nga sila gikan sa Barangay Duljo-Fatima sa Cebu City apan diha na nag-operate sa Siyudad sa Talisay.

Iyang giangkon nga lisud sudlon ang lugar nga diin magburdohan ang managsuon.  Matud niya dihang nakabantay ang duha ka suspek ug daling nanulod sa ilang balay ug gikan didto gipamusil nila ang mga operatiba.

Tungod niini, adunay nahitabong pinusilay hangtud nga napatay gyud ang managsuon.

Sumala pa sa kapolisan, duna silay nakuhang gituohang shabu nga gisulod og balde ug gilubong sa yuta diha sa tugkaran sa gipuy-an sa duha. Ang maong ilegal nga drugas 1.2 ka kilo ang gibug-aton nga mokantidad og P8.1 milyones.

Nakuha sab ang duha ka .45 nga armas gikan sa duha nga napatay.

Nasikop usab ang unom nga giingong kauban sa magsuon sa diha sa maong panimay. Nailhan sila nga si Randyl Añabeza, 27; Johnrey Vitor; Jackson Ogong; Christopher Infiesto; Neilrenz Francisco ug ang drayber sa magsuon nga si Wilfredo Narsico.

Si Police Regional Office-7 director Chief Supt. Debold Sinas midepensa sa iyang mga sakop kay matud niya dili matawag nga operational failure ang nahitabo maong napatay ang upat.

Alang kaniya, matawag lang nga operational failure kun mapatyan og polis o may maamong nga sibilyan sanglit nagpasabot kini nga wala matarong ang pagplano sa maong operasyon.

"Drug addict mamatay dili na failure sa amoa. Ang failure kanang daghang madamay nga sibilyan," si Sinas miingon.

Si Cebu Provincial Police Office director Police Senior Supt. Manuel Javier Abrugena miingon nga ang managsuong Rodrigo ug Noel mga remnants sa napatay sab nga gipasanginlang drug lord nga si Jeffrey "Jaguar" Diaz.

Giingong pagkamatay ni Diaz mibiya na ang duha didto sa Duljo- Fatima ug didto na nag estar ug gipadayon ang ilang illegal nga negosyo sa Dakbayan sa Talisay.

Andam usab silang moatubang kun dunay imbestigasyon ang Commission on Human rights (CHR) sanglit masaligon siya nga usa kadto ka legitimate operation.

"We always encourage the CHR to investigate so that they will know what really happened," matud niini.

Pasangil ni Sinas, mga isog ug armado gyud ang mga drug personalities sa Dakbayan sa Talisay hinungdan nga gikinahanglan gyud nga pangandaman sa mga polis ang matag operasyon kontra drogas didto.

"Basta di lang mosukol di man gyud unsaon. Pero ang Talisay kasi lain gyud ang attitude eh, ing-ana gyud na sila mga armado gyud nang taga-Talisay," sigun sa maong heneral. Si Sinas mipadayag nga nalipay siya nga dinagko na ang mga operasyon sa kapolisan.

"As the regional director, lipay ko ang atong mga polis ni level up na ang operation. Makaguol lang kay naay nangamatay," padayag ni Sinas. (/IBM)(BANAT NEWS)