Kapin sa P500 mil gihatag sa DOLE ngadto sa PWDs

CEBU, Philippines – Kapin sa P500 mil nga livelihood assistance ang gitunol sa Department of Labor and Employment (DOLE) pinaagi sa Tri- City Field Office alang sa Helping Hands Organization of PWD’s Incorporated.

Ang TCFO naglangkub sa Cebu, Mandaue, Lapu-Lapu, diin mismo si DOLE-7 regional director Atty. Johnson Cañete ang personal nga nitunol sa P538 mil nga balor sa tseke ngadto kang Venerando Ingking, presidente sa grupo.

Matud ni Cañete nga ang maong ayuda gamiton sa 27 ka beneficiaries nga miyembro sa Helping Hands Organizations.

Ang langkuban sa maong ayuda mao ang wellness, shirts ug mug printing, electronics repair shop, computer printing, tailoring ug food business alang sa PWD. Si Emmanuel Ferrer, TCFO chief labor and employment officer nagkanayon nga hugot ang ilang pakig-alayon ug monitor sa maong proyekto uban sa Helping Hands Organizations.

Ang maong financial assistance ayuda kini sa DOLE alang sa agenda sa gobiyerno nga inclusive growth pinaagi sa massive job generation and poverty reduction. (/BDB)(BANAT NEWS)