Modernong jeep hapit na modagan
CEBU, Philippines – Mahimo nang makadagan sa kadalanan sa Siyudad sa Sugbo ang 40 ka modern public utility vehicles (PUVs) sa Persano Corporation subay na sa pag-aprubar sa konseho sa ilang travel line.
Atol sa special session kagahapon sa buntag ang mga miyembro sa konseho mitando sa resolusyon ni Konsehal Eugenio Gabuya Jr. nga naglatid sa rota sa modern PUVs. Kini human si Gabuya mipasalig sa konseho nga ang existing jeepneys dili maapektuhan sa deployment sa units sa modern PUVs.
Si Konsehal Dave Tumulak, tsirman sa Committee on Public Order and Safety mipahibawo sa ubang legislators nga ang 40 ka PUVs magdagan sa identified missionary routes.
Pasabot sa missionary routes mao kini ang mga lugar nga walay jeep nga moagi.
“Last week I had a meeting with CCTO to discuss the travel line. In regards with the route, dili maapektuhan ang mga jeep kay this is not part of the original travel line of PUJs”, asoy ni Tumulak.
Dunay duha ka travel line sa 40 ka PUVs diin ang unang rota gikan sa Cebu City Hall, Asia Town I.T Park via Robinsons Galleria, Cebu Business Park ug vice versa.
Ang ikaduhang rota gikan sa R. Duterte Street via Happy Valley, Fuente Osmeña, Ramos Street, D. Jakosalem Street, Cebu Business Park ug Vice Versa.
Matag rota adunay 20 ka PUVs nga gi-assigned.
Gikinahanglan ang approval sa City Council una ang Persano Corp. maka-operate sa modern vehicles.
Sayo niining buwana gisumetir sa Persano Corp. ang identified routes ngadto kang Gabuya.
Sa wala pa kini gipresentar sa konseho, ang Cebu City Traffic Office mi-review ug mi-evaluate sa maong travel lines. Nunot sa maong kalambuan si Atty. Vigor Mendoza, chairman sa Persano Corp. mapasalamaton nga ang konseho niaprubar sa travel lines.
Naghuwat nalang sila nga aprubahan sa Land Transportation Franchising and Regulatory Board (LTFRB) ang gi-propose nila nga pletehan nga otso pesos ug dugang piso sa mosunod nga mga kilometro una pa mo-operate.
“We thank the City Council and the Mayor. Now we can serve the people of Cebu City. Once we get the LTFRB approval on fare hopefully in the next 2 days”, matud ni Atty. Mendoza.
Kun operational na ang maong modernong PUVs, monitoron kini sa CCTO alang sa evaluation ug sa mga posibleng adjustments. Ang operation sa maong PUVs subay na sa programa sa national government nga pag-modernize sa mga karaan nga jeepneys. (/DILT)(BANAT NEWS)
- Latest
