Misa de Gallo malinawon; painitan dugokon sa manimbahay
CEBU, Philippines – Ang painit sama sa puto maya, budbod, bingka ug sikwati human sa Misa de Gallo maoy hugopan sa mga relihiyosong Katoliko human sa ilang pagsimba.
Usa lang ang Dakbayan sa Mandaue nga daghan ang nagtanyag og painitan nga kasagaran maagian sa mga manimbahay.
Naandan na kini sa mga manindahay sulod sa daghan nang katuigan nga magtukaw sayo sa kadlawon aron usab mapahimuslan ang talagsaong kahigayonan.
Subay niini, malinawon ang duha ka adlaw nga Misa de Gallo sa Central Visayas matud pa sa direktor sa Police Regional Office-7 nga si Police Chief Supt. Debold Sinas.
“So far, ok ang arrangement. Na in-place ang mga police assistance desk, the forces were deployed earlier,” butyag ni Sinas sa iyang press conference kagahapon.
“The PDs (provincial directors) reported nga the first day was very peaceful and orderly,” dugang sa maong heneral. Sa mga dagkung simbahan sa Dakbayan sa Sugbo diin tag duha ka misa ang ipahigayon, hapsay ra kini matud ni Sinas.
Gani aduna say Misa de Gallo sa Saint Ignatius Chapel sa Camp Sergio Osmeña, ang kampo sa PRO-7 diin si Arsobispo Jose Palma ang nangulo sa misa atol sa ikaduhang adlaw.
Giingong tuyo gyud nila nga giimbitar si Palma diin matud ni Sinas mipataas kini sa morale sa kapolisan.
“We really invited Palma para makita niya nga ang polis sa PRO-7 na we really practice our faith. We encouraged our police to really practice their faith,” dugang ni Sinas.
Gibutyag usab niini nga walay lamat ang ilang relasyon sa arsobispo.
Gani, gihangyo niya kini nga giyahan ang mga polis sa oras nga mahilayo na kini sa Ginoo.
“Gihangyo gyud namo na siyempre regular gyud mi niya i-guide, kuhaon ang among attention pagmedyo nabaling na mi gamay,” si Sinas nagkanayon. (Camille L. Pateres/DILT)(BANAT NEWS)
- Latest
