“Spot amnesty” Alang sa gi-impound nga mga motor
CEBU, Philippines — Nagsugod na sa pag-uli ang Cebu City Transportation Office (CCTO) sa 2,500 ka na-impound nga mga motorsiklo nga nakalapas sa anti-counterflowing policy kagahapon.
Ang maong kalambuan subay sa kamanduan ni Mayor Tomas Osmeña nga ipatuman ang “spot amnesty” gumikan usab sa nahimong desisyon sa Korte Suprema nga nagpahunong sa operasyon sa Angkas lukop nasud.
Nihimo ang mayor sa maong kamanduan pagmenus sa impact sa suspension ngadto sa mga sumasakay kansang transportasyon mao ang pagsakay og motorsiklo.
Una nang namahayag si Osmeña nga ang pagpahunong sa operasyon sa Angkas naghatag og kadaut sa mga sumasakay sanglit sagad sa mga residente sa bukirang barangay naggamit og motorcycle hailing app.
Kahinumduman nga niadtong buwan sa Pebrero ang CCTO miimplementar sa Executive Order 34 kon anti-counterflowing policy ang siyudad nga nagpahamtang og silot sa mga malapason nga mga drivers. Tinguha niini nga madisiplina ang mga drivers ug pagmenus sa vehicular accidents.
Ang maong mga motorsiklo anaa gipahiluna sa may Bigfoot Studios sa South Road Properties diin gi-impound kini sulod sa 30 ka adlaw subay na sa nakalatid sa palisiya.
“Wala’y multa pero ato ning klarohon atong ipadayon ang counterflow, this is just a spot amnesty. Okay ra, pero dili mahunong ang arrest", ni Osmeña pa.
Ang operations chief sa CCTO Francisco Ouano miingon nga ang mga na-impound nga motorsiklo anaa sa maayong kondisyon ug kadtong nakalapas sa ikaduhang higayon mobayad og multa nga tres mil pesos.
Giklaro sab niini nga walay labot sa direktiba sa mayor ang pag-release sa mga na-impound nga mga sakyanan. “Wala pa sad ta kadawat og order ni mayor nga ipa-release ang vehicles sad", matud ni Ouano. — (/DILT)(BANATNEWS)
- Latest
