Hantakan, tooter, tinfoils maoy gihimong dekorasyon sa Pasko

CEBU, Philippines – Sa pinalahi nga dekorasyon , gigamit sa kapolisan sa Dakbayan sa Talisay ang mga nasakmit nilang mga ebidensya gikan sa nagkalain-laing operasyon isip adorno sa kapaskohan nga ilang gibutang atubangan sa ilang buhatan.

Ang mga bato sa hantakan ug drug paraphernalia gihimong Belen, bora-bora nga tambutso gihimong parol isip dayan-dayan sa Talisay City Police Station.

Gani ang ilang ginama gihatud na sa Cebu Provincial Police Office (CPPO) aron isalmot sa panindotay sa dayan-dayan sa Pasko.

Si Police Officer 1 Khacel Ann Sanchez sa Talisay City Police nagkanayon nga mga recycled materials unta ilang gamiton, apan sa ilang stockroom ilang nakita ang daghang butang nga wala nay mga gamit hinungdan nga mao na kini ilang gigamit.

Matud pa ni Sanchez nga ang mga antoganan sa hantakan gihimong pundasyon sa gipormang Belen nga ginama sa mga tinfoils, tooter ug uban pa.

Wala hinuon siya mobutyag kun ang mga kaso niining mga ebidensyang nasakmit nga ilang gigamit naresolba na sa mga hukmanan.

Samtang ang mga bora-bora nga tambutso mao ang nagsilbing dako nga bituon nga nihatag og kahayag sa Belen.

Gipasabot ni Sanchez nga ilang gihuna-huna kaniadto nga basin kun lainon sa pagsabot sa katawhan ang ilang gihimo apan sila nagtuo nga ang tanang butang mahiusa ra sa kaayuhan tumong sa kaayohan.

“We believe nga all things work together for good,” asoy pa ni Sanchez. Si Supt. Marlu Conag, pangu sa kapulisan sa siyudad maoy nihatud sa ilang parol didto sa CPPO. (/IBM)(BANAT NEWS)