DSWD mutabang sa mga kabus nga magnegosyo
CEBU, Philippines – Ang Department of Social Welfare and Development (DSWD)-7 mihimo og programa nga Sustainable Livelihood Program, diin laraw niini ang pagtabang ug pagtudlo sa mga gagmay’ng negosyante aron matarung pagdumala ang tagsa-tagsa nila ka mga panginabuhian.
Si Rizalina Patindol, Regional Program Coordinator ug pangulo sa SLP, nagkanayon nga usa kini ka capacity building program diin kon ilang tudluan ug bansayon ang mga gusto makapanag-iya og ginagmay’ng negosyo ug kung mahanas na, ila kining hatagan og capital o puhunan.
Si Patindol miingon nga ang mamahimong makabenepisyo sa maong programa mao ang mga kabus nga mopakita og interes magnegosyo.
Adunay duha ka modalit ang SLP, una ang seed capital fund diin hatagan ang benepisyaryo og start-up capital para magsugod sa negosyo ug employment assistance fund o tabang sa mga membro sa pamilya nga motrabaho apan walay kwarta nga magamit.
Hatagan sila P5,000 pagsiguro para lukat sa mga requirements alang sa ilang trabaho.
Si Elvira Roces, 56, taga Loboc, Bohol nga adunay display sa iyahang produkto gawas sa buhatan sa DSWD-7 miingon nga dako og tabang niya ug sa uban niya nga kaubang beneficiaries ang maong proyekto. Ang objective sa SLP mao mulambo ang mga kinabuhi sa mga kabus labi kadtong mga anaa sa lista sa Pantawid Pamilyang Pilipino Programa o 4Ps. (Joevelon G. Pinay/LPM)(BANAT NEWS)
- Latest
