International port sa San Fernando tukoron sa sunod tuig
CEBU, Philippines – Gikatakdang ipahigayon na sa buwan sa Enero sunod tuig ang bidding sa international passenger port sa Lungsod sa San Fernando.
Kini ang gibutyag ni Mayor Lakambini “Neneth” Reluya ngadto sa mga tigbalita.
Matud ni Reluya nga gikan sila sa kaulohan alang sa presentasyon sa DOTr kalabot sa passenger roll on and roll off cargo.
Gibutyag ni Reluya nga mokabat ngadto sa P3.6 bilyones ang kantidad sa kinatibuk-ang proyekto diin posibleng mogamit alang sa unang hugna sa budget nga gitagana sa DOTr nga P368 milyones.
Matud usab ni Reluya nga dako ang posibilidad nga sa buwan sa Marso mapahigayon na ang ground breaking sa maong proyekto diha sa Barangay South Poblacion sa maong lungsod.
Malaumon si Reluya nga ang maong lugar nga tukoran sa international port mahimong port zone ug mapalapdan pa ang maong lugar ug wala na unyay residential.
Ang kagamhanan sa lungsod nangandam na sa pagpahiluna unya sa mga mananagat nga maapektohan sa proyekto. Gilauman nga mosaka ang income sa lungsod sa higayon nga mahuman na ang maong proyekto. (/BDB)(BANAT NEWS)
- Latest
