Night market gidumala na sa siyudad

CEBU, Philippines – Dili na tugotan sa kagamhanan sa Siyudad sa Sugbo ang mga private organizers nga mopahigayon og night market sa dalan Legaspi ug P. Lopez nga mokolekta og kwarta sa dul-an 200 ka mga gagmayng manindahay.

Epektibo kagahapon sa gabii, ang siyudad na maoy modumala sa operasyon sa night market human si Mayor Tomas Osmeña mihimo og aksyon sa mga reklamo nga iyang nadawat nga matud pa gipangwartahan ang mga manindahay.

Ang Executive Assistant sa mayor nga si Francisco Fernandez miingon nga dili gusto ni Osmeña ang maong sistema diin gihimong gatasan ang mga manindahay sa mga organizers. Base sa report, giingong ang mga organizers mangolekta og P180 ngadto na sa P350 sa mga manindahay.

Subay sa kausaban, ang City Treasurer’s Office na ang mokoleta og P50 kada gabii sa mga manindahay.

Sukad niadtong Nobyimbre 16, ang mga manindahay gitugotan nga makatinda sa naasoy nga mga dalan panahon sa kagabhion.

Adunay special team nga giumol aron maoy mo-monitor sa night market operation ug kini gilangkuban sa City Administrator’s Office, Division for the Welfare of the Urban Poor ug PROBE Team.

Kadtong masakpan nga mobayad o mohatag gihapon og kwarta sa mga organizers i-disqualify sa pagpamaligya sa night market.

Nagsugod na sila og screen sa mga manindahay aron pagsusi kon sila residente sa siyudad. Samtang ang pangulo sa PROBE nga si Raquel Arce miasoy nga ipatuman nila ang “No ID, No Vending” policy. Ang ID maoy magpamatuod nga sila residente sa Cebu City.

Hinoon kadtong mga dili residente sa siyudad i-akomodar lang kon dunay pay lugar. (/DILT)(BANAT NEWS)