RLEC gibanhaw
CEBU, Philippines – Mga law enforcement agency sa rehiyon-7 nagkahiusa ug nimugna og drug interdiction program sa mga pantalan ug tugpahanan subay sa pagkunhod sa presyo sa shabu nunot sa taho nga midaghan ang supply sa drugas.
Atol kini sa pagbalik sa Regional Law Enforcement Coordinating Committee (RLEC7) meeting niadtong Martes.
Matud sa direktor sa Police Regional Office (PRO)-7 Chief Superintendent Debold Sinas nga karong semanaha gikatakdang magpirrmahanay sila og memorandum of agreement (MOA) kabahin sa maong programa diin ang Philippine Drug Enforcement Agency (PDEA)-7 maoy magsilbing ulo niini.
Gitawag kini og Airport Drug Interdiction ug Seaport Drug Interdiction.
Subay kini sa mga impormasyon nga nadawat sa mga otoridad diin giingong gibiyahe gikan sa Manila ang supply sa drugas ug ang uban ipaagi sa “roll on, roll off (RoRo).
Sa laing bahin, si Lieutenant Junior Grade Michael Encina, tigpamaba sa Philippine Coastguard 7, mitataw nga aduna na usab silay gibuhat kaniadto nga mga programa sa pag-interdict sa mga kontrabando ug mahingusgan kini karon tungod sa paghiusa sa mga ahensiyang hingtungdan.
Ang PCG-7 usa sa mga miembro sa RLEC-7 ug lakip usab sa MOA nga gilusad. (/BDB)(BANAT NEWS)
- Latest