Cebu City treasurer mobalik sa admin
CEBU, Philippines — Ang Bureau of Local Government and Finance (BLGF) sa Department of Finance (DOF) mi-designate kang kanhi Cebu City Accountant Arlene Rentuza isip bag-ong acting treasurer. Kini human ang term of service ni kanhi City Treasurer Veronica Morelos natapos niadtong Lunes, Disyembre 10.
Nunot niini, epektibo kagahapon, si Rentuza opisyal nga mihimo sa iyang trabaho isip bag-ong acting treasurer. Kahinumduman nga miasumir si Morelos sa katungdanan isip acting city treasurer gikan niadtong Disyembre 10, 2017 hangtud niadtong Lunes.
Si Morelos sa iyang bahin miingon nga ang iyang appointment kaniadto isip treasurer temporary designation lang isip hulip ni retired treasurer Tessie Camarillo.
Tumong sa maong reassignment kini aron dili mabiyaan ang trabaho ug responsibilidad sa city treasurer.
Sa kasamtangan si Morelos naghuwat sa kamanduan ni Mayor Tomas Osmeña kon unsa ang iyang trabaho sa City Administration Office.
Gibutang sa BLGF nga si Rentuza kinsa nahimong acting city treasurer sulod sa usa ka tuig, subay na sab sa rekomendasyon sa mayor niadtong Nobyimbre 16.
Ang maong order naghatag sab og direktiba kang Rentuza pagpaniid sa mga probisyon sa Republic Act No. 7160 kun Local Government Code of 1991 ug ubang pamalaud. Sa iyang bahin, si Rentuza mipasalig nga mohimo sa iyang trabaho ingon man ang pagkolekta sa buhis ug uban pa.
“Primarily, we do what we are mandated to do which is to collect the taxes. Mao gyud na ang primordial concern sa office. Of course, in accordance with the government regulations on disbursement of funds, COA dictated policies and pertinent laws governing the management of funds”, matod ni Rentuza.
Dili kini ang unang higayon nga mohimo sa maong trabaho si Rentuza sanglit nahimo na sab niya kini dihang na-reelected si Osmeña niadtong tuig 2016. Ug sukad niadtong tuig 2006, si Rentuza miserbisyo sa siyudad. Gawas sa iyang pagka accountant, nadestino sab kini sa Internal Audit Service Office sa panahon ni kanhi mayor Michael Rama. - DILT, (BANAT NEWS)
- Latest
