Furniture shop sa Cagudoy naugdaw

CEBU, Philippines — Balay, furniture shop ug laing building ang nasunog kagahapon sa kadlawon sa may Sitio Cagudoy, Barangay Basak, Dakbayan sa Lapu-Lapu.

Ang sunog nga adunay gibanabanang danyos nga P600 mil, nagsugod sa panimalay ni Wilfredo Cosep ug mikatap kini sa iyang furniture shop ug sa laing building.

Nadawat sa kabomberohan ang alarma sa sunog, ala 1:05 singko ug giisa ngadto sa ikatulong alarma pagka 1:20, nahimong task force alpha alas 2:03 ug hingpit nga nakontrolar alas 2:20 sa kadlawon.

Matud ni FO1 Charity Seno sa Lapu-Lapu City Fire Station, padayon pa nilang gisusi kun unsay hinungdan sa sunog.

Dugang ni Seno nga hingpit nga naugdaw ang balay ug ang furniture shop nga gipanag-iya ni Cosep samtang nakan-an ang tupad niini nga building ug walay naangol o nakalas atol sa hitabo.

Samtang ipaubos sa reblocking sa Division for the Welfare of the Urban Poor (DWUP) ang Purok 3, Brgy. Kamputhaw nga naigo sa sunog sa miaging semana.

Kini mao ang ilang nasabutan sa meeting niadtong Lunes sa gabii uban ang mga residente, taga Cebu City Disaster Risk Reduction Management Office ug Department of Engineering and Public Works (DEPW).

Gihangyo nila ang mga nasunugan nga mokooperar dungan sa pagpahibawo nga dili pa sila makabalik og tukod karong buwana kay dili mahuman sa technical team ang trabaho gumikan sa holidays.

“We are going to be proactive with our actions mao na instead of letting them comeback in the same areas ato i-reblock ang area”, asoy ni DWUP operations head Genevieve Alcoseba.

Dugang ni Alcoseba posibleng maapektuhan ang mga istruktura nga wala masunog atol unya sa himoong reblocking sa dapit.

Kinahanglan nilang mahan-ay ang tanan aron insakto ang sukod sa mga luna ug ma-establisar ang tarong nga road right of way alang sa panahon sa emerhensiya.

Nasayran nga ang lugar nga nasunog, gipanag-iya sa University of the Philippines ug subay niini, karong semanaha mopadala sila og komunikasyon sa maong unibersidad kay ila sab kining tukion sa local housing board. -  DILT, (BANAT NEWS)