Barug Party accredited na sa COMELEC

CEBU, Philippines — Opisyal nga gipahibawo sa founder sa Partido Barug nga si kanhi Cebu City Mayor Michael Rama nga ang ilang grupo, accredited ug narehistro na sa Commission on Elections (Comelec) isip local political party.

“I am very happy to announce as we are gathered here that our political party Partido Barug has just been registered, accredited by Comelec, we are an official political party”, pahibawo ni Rama.

Gibutyag ni Rama ang maong kalambuan dihang nagpatawag kini og press conference kagahapon sa buntag diin giubanan siya sa iyang mga ka partido ug dumadapig.

Si Rama miingon dugay ra nila giplano nga ilisdan ang ilang ngalan nga Team Rama kay dili siya gusto nga ang ilang partido maila nga apelyido sa usa ka pamilya.

Gihimug-atan hinoon niini nga dili mawagtang sa kasaysayan nga ang Team Rama naglangkob sa mga mosunod nga partido sama sa KUSOG, ANAD, PANAGHIUSA, UNA ug karon PDP-Laban.

Si Atty. Mat Eric Medalle, secretary general sa Partido Barug maoy mibasa sa resolusyon nga giisyu sa first division sa COMELEC nga ilang nadawat niadtong Disyembre 7.

Ang maong kalambuan gikalipay sa mga kaubanan ni Rama sama ni Vice Mayor Edgardo Labella kinsa miingon nga sila magtinabangay sa pagtrabaho alang sa kalambuan sa siyudad.

“We will work together as one big party, as one big political family and kanang mga intriga nga gipakatap whether kaatbang or unsa ayaw mo padala ana because we have gone a long way together with Mayor Mike, we started this group as early as years ago and maybe only death can do us part”, matod ni Labella.

Si Labella maoy tsirman sa PDP-Laban Cebu City Chapter ug maoy mopapili pagka mayor sa siyudad sunod tuig atbang ni Mayor Tomas Osmeña. (Decemay P. Padilla/DILT)

Radaza natingala nga nalakip sa EWAS ang Lapu-Lapu

Natingala si Mayor Paz Radaza sa pagkalakip sa Dakbayan sa Lapu-Lapu  nga usa sa mga dapit dinhi sa Sugbo nga anaa sa Election Watchlist Areas  (EWAs)  sa umaabot nga 2019  midterm elections.

Gumikan niini, buot masayran ni Radaza kun unsay gibasehan sa kapolisan ug COMELEC nganong naapil sa listahan sa EWAs ang siyudad kay wala may nahitabong kagubot sa mga miaging piniliay.

Taliwala sa maong reaksyon sa mayor, iya gihapong gitahod ang hukom sa kapolisan.

Ang nahimong reaksyon ni Radaza, sukwahi sa nahaunang reaksyon ni Mandaue City Mayor Luigi Quisumbing kinsa mihangop sa nahimong desisyon sa PNP ug COMELEC nga ipaubos sa EWAs ang Mandaue. -  DILT, (BANAT NEWS)