PRO-7 nakadawat og mga ekipo alang sa daling sulbad sa krimen
CEBU, Philippines — Ang Police Regional Office (PRO)-7 nakadawat og mga bag-ong ekipo nga gamiton sa pagpalambo sa crime efficiency solution sa rehiyon.
Ang maong mga ekipo nga gilangkuban sa 197 ka filed investigation crime scene kit, upat ka safety vault, 27 ka thermal imager, 80 ka global positioning system (GPS) ug 100 ka bag-ong canik striker fired nga armas gikan kini sa Camp Crame ug gibendisyonan dayon kini diha sa Camp Sergio Osmeña sa PRO-7.
Matud sa direktor sa PRO-7 Chief Superintendent Debold Sinas nga ipang-apod-apod ngadto sa police officers ang maong mga ekipo gawas lang sa mga armas diin gitagana kini alang sa PRO-7.
Ang 51 ka filed investigation crime scene kit igahin alang sa Cebu Provincial Police Office; 51 usab sa Cebu City Police Office; 49 alang sa Bohol Provincial Police Office; 26 alang sa Negros PPO; tag pito ang Siquijor PPO ug Mandaue City Police Office ug unom ang ihatag ngadto sa Lapu-Lapu City Police Office.
Samtang ang mga thermal imager ug mga GPS ipang-apod-apod ngadto sa Regional Mobile Force Battalion-7 ug sa mga Provincial Mobile Force Company (PMFC) ug City Mobile Force Company (CMFC) sa mga CPO ug PPO sakop gihapon sa PRO-7.
Ang turn over ceremony kagahapon gipangulohan ni Director Elmo Francis Sarona, directorate for investigation and detective management.
Si Sarona nibisita sa Sugbo aron pangulohan usab ang pag-abli sa investigation officers’ basic course sa Sugbo.
Matud ni Sarona nga duyogan sa insaktong training dako og maabag ang maong mga ekipo sa daling pagsulbad sa mga krimen sa rehiyon ingon man sa pagsubay sa mga suspek nga nalambigit sa krimen.
“The more we train our personnel on investigating, the higher the crime solution efficiency becomes so there is a direct relationship between training with the equipment and the solution of cases”, matud ni Sarona atol sa media briefing kagahapon. (/BDB)(BANATNEWS)
- Latest
