Gidili ang pagparking duol sa fire hydrants
CEBU, Philippines — Hugot nga gidili karon sa tanang matang sa mga sakyanan ang pagparking sa mga dapit nga adunay fire hydrants sa Siyudad sa Mandaue.
Tumong sa kagamhanan sa Mandaue nga dili maalihan og mga sakyanan ang truck sa bombero nga magkarga og tubig ilabi na sa panahon nga adunay mahitabo nga sunog.
Nunot sa hingpit nga pagpatuman sa maong ordinansa, gitahasan ang buhatan sa Traffic Enforcement Agency of Mandaue (TEAM) alang sa pagbutang og mga signages nga nagpahibalo sa maong lugar nga “No Parking Zone”.
Gitahasan usab ang mga traffic enforcers sa pagpatuman sa maong ordinansa pinaagi sa pagdakop sa mga drayber nga makahimo og kalapasan.
Ang drayber nga makalapas sa ordinansa, makabayad og multa nga nagkantidad og P500 pinaagi sa pag-isyu og citation ticket nga maoy pagabasehan sa kalapasan nga nahimo sa iyang pagbayad ngadto sa buhatan sa tresurero sa dakbayan. (Romeo T. Limpangog/DILT)
Tulo ka lungsod sa Bantayan Island gibuligan sa Kapitolyo
Dili momenus P34 milyones nga kantidad sa mga proyekto ang giapud-apud sa Kapitolyo ngadto sa tulo ka lungsod sa Isla sa Bantayan.
Gitunol sa Kapitolyo ang mga gipangkonkreto nga dalan, playground sa mga bata, ambulansiya, evacuation centers, taytayan, foldable van ug material recovery ug composting facility nga mokantidad og P30.44 milyones.
Sa Lungsod sa Bantayan, giturn-over ngadto sa Brgy. Ticad ang usa ka taytayan nga nagkantidad og P9.6 milyones samtang sa Lungsod sa Santa Fe, nadawat usab ang usa ka evacuation center nga P6.2 milyones ang kantidad.
Ang Lungsod sa Madridejos nakaangkon og evacuation center nga gigastohan og P6.2 milyones, ambulansya nga tag P1.6 milyones ug pagkonkreto sa dalan sa Brgy. Mancilang nga adunay P5 milyones nga kantidad ang gihatag sa kagamhanan sa probinsiya.
Gawas sa maong mga proyekto, ang Kapitolyo nahatagan usab og grasya ang 1,814 ka mga kawani sa barangay nga naglakip sa barangay health workers, tanod, animal health care, day care workers, Lupong Tagapamayapa, ug barangay nutrition scholars gikan sa tulo ka lungsod.
Sila si Gobernador Hilario Davide III ug Bise Gobernador Agnes Magpale maoy nangulo sa pagturn-over sa maong mga proyekto niadtong Nobyimbre 30. (/DILT)(BANATNEWS)
- Latest