Mga magtutudlo dako’g papel kontra illegal drugs
CEBU, Philippines — Giawhag ni Gobernador Hilario Davide III ang mga magtutudlo sa Probinsya sa Sugbo nga monitoron ang ilang mga tinun-an aron makalikay nga malambigit sa illegal nga drugas.
Atol sa training sa mga trainers alang sa Drug Education for Curriculum Integration, si Davide nagkanayon dako ang papel sa mga magtutudlo aron magiyahan ang mga kabatan-onan nga dili mosimang og dalan.
“Solving the illegal drug problem is a shared responsibility. So I urge you to help the government keep our children away from theis menace by educating them about the perils that it inflicts on their lives,” matud ni Davide sa report sa Provincial Information Office.
Dili momenus 50 ka master teachers gikan sa 10 ka school divisions sa Sugbo ang nangapil sa maong seminar nga gipahigayon sa Cebu Provincial Anti-drug Abuse Office uban sa Department of Education (Dep-Ed).
Ang maong seminar subay kini sa tinguha nga maapil ang manual sa CPADAO ngadto sa kasamtangang curriculum kalabot sa drug education nga gipatuman sa Dep-Ed ngadto sa mga tinun-an sa high school.
Base sa website sa Cebu Provincial Government ang maong seminar nilungtad kini og tulo ka adlaw.
Sa maong report, matud ni Sylvio Sabino ang focal person sa Drug Education for Curriculun Integration sa Dep-Ed, ang maong training dili lang sa Sugbo apil na usab sa tibook school division sa Central Visayas.
Dugang niya nga bisan og aduna nay nagama ang Dep-Ed nga drug education curriculum, ang modules niini wala pay naapil nga kalihokan kon unsaon pagpadagan sa mga angay kat-onan sa mga estudyante.
“CPADAO’s manual is a complete material. All the teachers need to do is just choose the lessons they want to run and integrate in the curriculum,” matud ni Sabino.
Kun maapil na ang module sa CPADAO, plano sa Dep-Ed nga itudlo kini sa mga tinun-an sa Grade 7 ug Grade 10, ug gitan-aw usab nga itudlo sa mga tinun-an sa elementary. (/IBM)(BANATNEWS)
- Latest
