Nangilad gamit ang cellphone nga kinawat, sikop sa NBI
Le Phyllis F. Antojado (Banat) - December 7, 2018 - 12:00am

CEBU, Philippines — Usa ka babaye ang gidakop sa mga ahente sa National Bureau of Investigation (NBI-7) human kini giingong nangawat og cellphone ug gigamit kini sa pagpangilad og laing tawo.

Ang nasikop pinaagi sa entrapment operation mao si Theresse Lopez, 29-anyos lumad nga taga Malaybalay, Bukidnon. Gihimo ang operasyon sa usa ka money remittance center sa Brgy. Tabunok, Dakbayan sa Talisay niadtong Martes sa buntag.

Si Lopez gireklamo ni Glenda Fragio, 39-anyos nga taga Siyudad sa Lapu-Lapu human nga gikawat ni Lopez ang iyang cellphone ug kwarta nga dili momenus dos mil pesos niadtong Nobyimbre 13, sa dihang pareho silang mi-apply pagka call center agent.

Asoy pa sa biktima nga niadtong higayona, bag-o pa sila nagkaila ni Lopez kinsa nagpaila kaniya nga si Nicole ug nanghulam kini kaniya og cellphone.

“While nisulod ko sa interview, iya ko giingnan nga diri lang na imong bag. Nya ingon ko nga palihug bantay, day. Ingon siya, Okay”, saysay pa ni Fragio.

Dihang nahuman na ang interview sa biktima, wala na si Lopez ug dala niini ang iyang cellphone ug kwarta.

Dinhi na sab nasayran ni Fragio nga dili Nicole ang pangalan sa suspek.

Matud sa biktima nga iyang gipa-blotter sa Mabolo Police Station ang nahitabo apan walay aksiyon nga gihimo, hinungdan nga midangop siya sa NBI.

Si Fragio nagkanayon nga si Lopez, nagpaka aron-ingnon nga siya ug gigamit niini ang iyang Facebook account nga naka log-in sa iyang cellphone. Giingong nangilad kini sa iyang mga higala sa social media ug kunohay nagpakitabang ug nangayo og kwarta.

Nasikop si Lopez sa mga sakop sa NBI dihang mikubra kini sa usa ka libo ka pesos nga padala kunohay sa amiga sa biktima.

Naghilak nga miatubang sa mga sakop sa media si Lopez, ug miingon nga tungod sa kalisod, nahimo niya ang ingon.

Gibutyag niini nga bag-o lang siyang nakuhaan ug aduna pa siyay tulo ka anak sa Bukidnon ug kinahanglan niyang mouli.

“Dili nako intention nga mohilabot. Needed lang gyud nako”, butyag sa suspek.

Giangkon niini nga ka duha na siyang nakabiktima og pagpangilad.

Napasakaan na og kaso si Lopez sa piskaliya sa Talisay ug nag-atubang kini og kasong theft, estafa ug kalapasan sa Article 178 sa Revise Penal Code in relation to R.A. 10175 o ang Cybercrime Prevention Act of 2012 tungod sa iyang paggamit ug dili tinuod nga pangalan ug pangilad. -  DILT (BANAT NEWS)

NATIONAL BUREAU OF INVESTIGATION
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with