Probinsiya nagdali sa P1.2 bilyong resource center?
CEBU, Philippines — Si Kongresista Gwendolyn Garcia naalarma tungod sa giingong nagdali ang kagamhanan sa Probinsiya sa Sugbo sa pagpatukod sa P1.2 bilyones nga 20-storey resource center diha sa Capitol compound.
Kini bisan og wala pa makadawat ang National Historical Commission of the Philippines sa tubag sa Kapitolyo kalabot sa bag-ong development plan sa maong edipisyo.
Ang NHCP nipadala og sulat ngadto sa provincial administrator Atty. Mark Tolentino nagpahimangno sa Kapitolyo kalabot sa bag-ong development plan human nasayran sa NHCP nga ang Bids and Awards Committee sa Kapitolyo nirekomendar na kini sa WT Construction nga maoy motukod sa maong resource center.
Niadtong Mayo 2, 2017 ang NCHP nipadala kini og sulat ngadto sa Kapitolyo kabahin sa rekomendasyon nga kinahanglan ang edipisyo nga tukoron “arranged symmetrically” sa parehong side sa karaan nga Capitol building.
Si Garcia kinsa gihatagan og kopya sa sulat nga bag-ong giluwat sa NHCP nikwestiyon sa giingong pagdali sa Kapitolyo sa pagpatukod sa maong edipisyo.
Si Tolentino sa iyang bahin, nagkanayon nga nipadala ang Kapitolyo og team ug design consultants sa NHCP aron ipadangat ang position ug tubag sa concerns sa maong ahensiya.
Dugang ni Tolentino nga nipadala ang gobernador ngadto sa NHCP niadtong Hulyo 6, 2018 pagpahibalo nga adunay stakeholder consultation nga gihimo ang Kapitolyo ug nakakuha ang probinsiya og locational clearance gikan sa office of the zoning administrator sa Dakbayan sa Sugbo. - BDB (BANAT NEWS)
- Latest