Hospital, ambulansya ug serbisyo libre na
CEBU, Philippines – Libre na ang pagpatambal ug paggamit sa ambulansiya sa mga provincial ug district hospitals karong giaprubahan na sa Hunta Probinsyal ang ordinanasahon pag-amendar sa The Revenue Code of 2008 sa Lalawigan sa Sugbo.
Ang kausaban sa maong ordinansa naghatag og libre nga hospital services sa tanang kabus nga pasyente.
Si Bise Goberandor Agnes Magpale nagkanayon nga sa revenue code, aduna gyud charges sa mga magpatambal sa mga hospital sa probinsya, hinungdan nga ila kini giamendaran aron nga malibre na ang serbisyo.
Kini bisan pa man nga makuhaan ang koleksyon sa probinsya gikan sa health services niini matag tuig.
Matud sa bise gobernador nga gikwenta sa Provincial Health Officer nga si Dr. Rene Catan nga moabot sa 6% ang mawala sa koleksyon sa probinsya gikan sa tibook nga koleksyon niini sa health services matag tuig.
“What is 6%, that’s only about P8 million a year? What is that compared to the kind of service that we will be giving to our indigent patients,” matud ni Magpale kinsa nidugang nga mao kini ang nakakombinsir sa mga bokal nga aprobahan ang maong ordinansahon.
Atol sa regular session sa provincial board niadtong Lunes, walay nisupak sa pagpasar sa ordinansahon alang sa libre nga pagpatambal.
Apil sa libre nga hospital service mao katong sa outpatient department, ER services, dental services, diagnostic/laboratory services lakip na ang clinical chemistry, ang paggamit sa charity ward, delivery room fee, operating room fee ug uban pa.
Apil nga libre ang paggamit sa ambulansya. Kinahanglan nga adunay mapakita nga certificate gikan sa PhilHealth card ug ang social worker nga ang pasyente usa ka indigent o kabus.
Si Gobernador Hilario Davide III nisaad nga walay pamolitika nga mahitabo sa kon kinsa sa mga kabos ang mamahimong maka- avail niini. -/IBM (BANAT NEWS)
- Latest
