Mga priso ibalhin sa bag-ong building

CEBU, Philippines – Hamugaway na unya ang kahimtang sa mga Persons Deprived of Liberty (PDL) sa Cebu City Jail female dormitory human sa gipahigayon kagahapon nga blessing ug turn-over sa 4-story building nga maoy balhinan unya sa mga babaye nga PDL.

Si Konsehal Dave Tumulak, chairman sa committee on public order and safety nagkanayon nga ang katukuran sa bag-ong pasilidad gikuha sa P101 milyones nga pundo gikan sa nasudnong kagamhanan ug ang luna nga gitukuran niini iya sa Siyudad sa Sugbo.

Ang kapasidad sa female dormitory sa CCJ naa sa 200 apan sa kasamtangan niabot ngadto sa 400 ka PDL ang nag-ukopar niini.

Matud ni Tumulak nga kon makompleto na ang gikinahanglan sa bag-ong pasilidad ang mga female PDL mahimo na nga mobalhin ug ang karaan unya nga building gamiton sa dul-an 500 ka inmates sa Naga City Jail kinsa tinguhang ibalhin sa female dormitory tungod kay ang likod nga bahin sa Naga City Jail delikado gumikan sa nahitabong landslide sa siyudad.

Gihulagway ni Tumulak nga ang bag-ong building “well ventilated” ug makadaginot usab sa kuryente sanglit mosulod man ang kahayag sa adlaw. -/BDB (BANAT NEWS)