Duha sikop sa buy-bust

CEBU, Philippines – Nasikop ang usa ka drayber sa habal-habal ug iyang kakunsabo sa gipahigayon nga buy-bust operation sa kapolisan niadtong Martes sa gabii diha sa Barangay Candulawan, Dakbayan sa Talisay.

Ang mga nasikop mao sila si Eric Bacalso Padigos, 39-anyos, drayber sa habal-habal, nagpuyo sa maong dapit ug si Rolly Badayos Cabriana, 52, taga Barangay Bulacao sa maong Siyudad.

Ang kapolisan nipahigayon og operasyon human nakadawat og report labot sa giingong ilegal nga kalihukan ni Padigos.

Nasakmit sa mga polis gikan sa mga suspetsado ang 29 ka gagmay nga pakite sa shabu nga nitimbang ngadto sa 1.45 gramos nga adunay balor nga P17,110.

Giingon nga sideline ni Padigos ang pagpamaligya og ilegal nga drugas samtang siya mamasahero sa iyang motorsiklo.

Ang mga suspetsado nagtingkagol diha sa detention cell sa Talisay City Police Station. -/BDB (BANAT NEWS)