Ipatuman nga rota atol sa pista sa Lapu-Lapu

CEBU, Philippines — Si Mayor Paz Radaza sa Dakbayan sa Lapu-Lapu niluwat og memorandum sa pagsuspenso sa klase sa mga publikong tulunghaan ingon man ang trabaho sa kagamhanan sa siyudad karong Nobiyembre 20, 2018 sa pagsaulog sa kapistahan sa Birhen sa Regla nga patrona sa siyudad.

Nunot niini, ang City Traffic  Management System (CTMS)  mopakatap og gatusan nila ka traffic enforcer diha sa kadalanan alang sa paghapsay sa dagan sa mga sakyanan atol sa maong adlaw.

Si Mario Napuli, hepe sa CTMS niluwat og traffic advisory sa kausaban sa rota sa tanang jeep pasaheroan ug ingon man FILCAB nga mosulod ug mogawas sa PUJ terminal ug mopaingon diha sa Marcelo Fernan Bridge diin anha kini paagion sa Maximo V. Patalinghug Avenue, moliko sa tuo nga bahin sa eskina Sangi, liko sa tuo sa access road sa terminal 1 aron mopakanaog ug magpasakay sa mga pasahero. Samtang ang tanang traysikol anha kini molabay sa GUSA basketball court ug mao gihapon ang ilang subayon sa ilang pagbalik alang sa pagpakanaog ug pagpasakay sa ilang mga pasahero

Ang tanang traysikol nga naggikan sa Sitio Sudtonggan, Sitio Masulog sa Barangay Basak, Sitio Suba Panas ug Marigondon Ylaya anha kini mopaingon sa bakanteng luna sa hoops dome alang sa pagpahiluna sa usa ka linya sa pag-parking ug sa ilang pagbalik nga nagdala na og pasahero  adto na kini moagi sa Humay-Humay road via M.V.  Patalingjug Avenue.

Gipahimangnoan usab  ang mga nanag-iya og sakyanan nga dili magpataka og parking aron kalikayan ang pag-towing sa ilang sakyanan ug dalhon ngadto sa impounding  area. (BANAT NEWS)