Operasyon sa P39M shabu pahalipayan sa konseho
CEBU, Philippines — Moduso si Konsehal David Tumulak og resolusyon sa paghangop sa kapolisan nga nitabang sa anti-illegal drug operation sa Barangay Tisa sa niaging adlaw.
Si Tumulak, pangulo sa committee on public order and safety sa konseho ug deputy mayor on police matters, niingon nga angay pahalipayan ang kapolisan tungod sa ilang nindot nga performance sa pagsakmit sa shabu nga nagkantidad og P39 milyones.
“Can you imagine, P39 million worth of shabu og naa pa ni sa atong barangays, daghan kaayo ang mangabuang. So pasalamat ta sa kada usa nga polis nga misalmot sa operation, at least also to boost the morale of our police," si Tumulak niingon.
Dugang pa niya nga ang nagmalampusong operasyon sa kapolisan nahimong usa ka pasidaan ngadto sa mga drug personalities nga ang kagamhanan sa siyudad ug ang Philippine National Police nagtinabangay aron sa pagsumpo sa ilegal nga drugas.
Giawhag ni Tumulak ang mga barangay sa siyudad sa pagpadayon sa ilang kampanya batok sa ilegal nga drugas tungod kay dili sayon ang pag-eliminate niini ug nanginahanglan kini og pagtinabangay sa matag ahensya sa gobiyerno.
Pabor siya sa ideya na mag-umol og ordinansa sa pag-regulate sa mga tag-iya sa apartment, hotels ug uban pa sa pagdawat og mga mangabangay.
Si Tumulak andam sa pagtuon niini tungod kay ang maong mga pasilidad mao ang gihimong area alang sa illegal drug trade.
“We will try because naa nama’y public consultation prior to the approval of the ordinance to get the sentiments of the concerned parties, uyon ta ana nga naa’y ordinance. Ato nang planohan,” siya niingon. (BANAT NEWS)
- Latest