Mangabangay og lawak ilhon

CEBU, Philippines — Giawhag ni Cebu City Police Office Director Royina Garma ang mga opisyal sa barangay nga mohimo og resolution o ordinansa nga mag-regulate sa mga apartment, boarding house o bed spacer diin aduna na unya silay mekanismo aron masayran ang mga namuyo sa maong balay.

Kini human sa pagkasikop ni Jeffrey Jade Cabaron kinsa nakuhaan og P39 milyones nga balor sa drugas sa giabangan nga apartment sa tag P10 mil ang buwan bisan wala kini trabaho ug aduna pay kaugalingong sakyanan.

Matud ni Garma nga kung ang mga residente sa komunidad lakip ang mga opisyal sa barangay kung aduna silay masayran nga kadudahan og lihok sa ilang lugar, mas maayo makig-alayon sa kapolisan aron mahimoan og validation.

Sumala pa ni Garma nga si Cabaron dul-an pa sa usa ka buwan nag-abang sa apartment ug gituohan nga kini maoy bodegero sa ginadili nga drugas diin sa iya kuhaon ang mga transaksyon.

Gibutyag ni Garma nga ang drugas nga nakuha gikan kang Cabaron low grade ug posibleng gikan kini sa kaulohan ilabi na ang sakyanan nga gimaneho niini nakarehistro sa Quezon City hinungdan nga ipaubos pa sab kini nila sa imbestigasyon.

Gipadayag ni Garma nga malipayon siya sa mga dagkung nasakmit nga ilegal nga drugas sa iyang kapolisan kay nagpakita kini sa ilang pagtrabaho dili lang sa mga street level apan apil na sa mga dagkung pusher.

Apan masulob-on gihapon siya tungod kay bisan sa subsob nila nga kampanya aduna gihapoy mga users. (BANAT NEWS)