Hepe sa CCPO nipadayag sa sitwasyon sa kapolisan

CEBU, Philippines — Gihangop sa mga sakop sa Commission on the Laity sa Archdiocese of Cebu atol sa ilang monthly lay caucus ang pagpasabot ni Police Senior Superintendent Royina Garma, direktor sa Cebu City Police Office (CCPO) kalabutan sa ilang trabaho isip polis. Matud ni Garma ngadto sa mga sakop sa Lay Organization Movements and Service ug Parish Coordinators nga silang mga sakop sa kapolisan padayon ang gihimo nga mga kampaniya batok sa mga krimen lakip na niini ang batok sa ilegal nga drugas.

Apan nagkinahanglan usab sila og tabang sa katawhan aron sila makasugakod sa ilang mga gimbuhaton.

Gibutyag ni Garma nga daghan silang dinakpan diin halos tanan nilang polis ang busy sa pag-atubang sa mga hearing sa kaso ngadto sa korte.

Silang mga polis padayon sa ilang serbisyo ug usahay mahimo usab silang mga biktima diin adunay mga pamilya nga magkatibulaag ug adunay mga anak nga maadto sa daotan nga bisyo tungod kay nag-duty sila sulod sa 12 oras.

Gipadayag ni Garma nga silang mga polis nagbantay sa katawhan samtang ang ilang pamilya dili nila makauban sa mga special nga kalihukan sama sa pasko, bag-ong tuig, Valentine’s Day ug uban pang mga kasaulogan tungod kay dili sila sayon-sayon nga tugotang maka-leave sa trabaho.

Bisan sa mga pagsaway sa katawhan batok sa kapolisan padayon gihapon sila sa ilang pagserbisyo alang sa pagmentenar sa kalinaw.

Ang pangulo sa Commission on the Laity Fe Barino nagkanayon nga gidapit nila si Garma sa ilang kalihukan tungod sa mga balita kabahin sa sunod-sunod nga krimen ug buot nilang masayran ang kahimtang usab sa kinabuhi sa kapolisan ug ang angayang buhaton nilang mga layko isip tabang sa kapolisan. (/BDB)(BANATNEWS)