Upat nalambigit sa drugas sikop
CEBU, Philippines — Upat ka tawo kinsa giingong nalambigit sa ginadiling drugas ang nasikop sa managlahing operasyon sa kapolisan sa Dakbayan sa Lapu-Lapu ug Talisay niadtong Biyernes sa gabii ug kagahapon sa kadlawon. Nadakpan sa buy bust operation sa kapolisan ang duha ka suspetsadong pusher og shabu sa Barangay Kalawisan, Dakbayan sa Lapu-Lapu sa miaging gabii.
Si Police Chief Inspector Jaime Tolentino sa City Intelligence Branch (CIB) sa Lapu-Lapu City Police Office (LLCPO) niila sa mga suspetsado nga sila si Arlie Niño Arizo Pahugot alyas “Boy Lagom”, 26-anyos, Franko Berame Baguio, alyas “Tangkoy”, 23, pulos nagpuyo sa maong dapit.
Matud ni Tolentino nga ang duha ilang nadakpan human sila nakadawat og mga taho gikan sa nagpakabana nga mga lumulupyo sa maong dapit labot sa giingong nagpadayon nga ilegal nga kalihokan sa duha diha sa maong lugar. Ang maong mga suspetsado giingong nasakmitan sa kapolisan og 23 ka gagmay nga paketeng shabu, P500 nga buy bust money ug P600 nga gituohang halin niini.
Sa laing bahin, duha ka mga giingong adik ang nadakpan sa kapolisan sa Siyudad sa Talisay diha sa managlahing barangay kagahapon sa kadlawon.
Ang kapolisan sa siyudad nakadawat og report kabahin sa ilegal nga kalihukan diha sa Sitio Neighborhood, Barangay Tabunok hinungdan nga nipahigayon dayon sila og operasyon.
Nasikop si Rogilito Rabyagon, 24-anyos, ulitawo, residente sa maong lugar ug nasakmit kaniya ang 10 ka gagmay’ng pakete nga shabu.
Duha ka oras ang nilabay nadakpan usab si Fedito Cabajar, Jr., 24, diha sa Sitio Lea, Barangay Linao sa maong siyudad. Giingong nakuha gikan sa suspetsado ang upat ka gagmay nga pakete nga shabu. (Gabriel C. Bonjoc/BDB)(BANATNEWS)
- Latest