Excise tax sa train 2 ipasuspenso

CEBU, Philippines – Buot sa tulo ka senador nga nibisita sa Sugbo nga ipasuspenso og usa ka tuig ang implementasyon sa excise tax sa lana ubos sa Tax Reform for Acceleration and Inclusion (TRAIN) Law 2.

Matud ni Senador Nancy Binay nga mao kini ang padayon nilang giduso nga dili lang ipasuspenso ang excise tax sulod sa tulo ka bulan apan sulod gyud sa usa ka tuig.

Matud ni Senador Sonny Angara nga padayon ang ilang pagsupak sa implementasyon sa dugang nga excise tax sa lana ubos sa TRAIN Law 2.

"I urged our economic managers to be sensitive to the plight of Filipino families who are struggling with skyrocketing inflation rate," matud ni Senador Joseph Victor Ejercito.

Sila si Angara, Binay ug Ejercito nibotar sa TRAIN Law 1 ug matud pa ni Binay nga tungod kini kay moubos ang tax exemption sa mga empleyado.

"Paulit-ulit naming tinanong yung mga economic managers kung ano ang epekto nang inflation rate sa implementasyon nang TRAIN Law 1 at ang sagot nila very minimal pero iba ang nangyari. Kaya ang deliberation  sa TRAIN Law 2, dadaan yan sa butas nang karayom," matud ni Binay.

Ang TRAIN Law 1 gi-implementar kini sugod Enero 2018 diin nakalatid sa maong balaud ang pagsaka sa presyo sa lana og P2 matag litro isip excise tax.

Nakalatid sab sa maong balaud nga kadtong empleyado nga nagsweldo og P250,000 o paubos matag tuig, wala na kini bayranan nga income tax.

Buot ang mga senador nga paginhawaon ang katawhang Pilipinhon sa pagsaka sa presyo sa mga palaliton pinaagi sa pagpadaplin una sa ikaduhang hugna sa usbaw sa excise taxes sa lana nga gikatakdang ipatuman sa Enero       2019.

Ubos sa balaud, ang excise tax sa diesel mosaka og P4.50 matag litro sa 2019 ug ang gasolina mosaka og P9 matag litro sa samang tuig. (/GMR)(BANAT NEWS)