Taho sa MNLF gipasusi ni Radaza

CEBU, Philippines – Hugtanong gipanghimakak ni Lapu-Lapu City Mayor Paz Radaza ang gikataho nga presensya sa mga sakop sa Moro National Liberation Front (MNLF) sa usa ka barangay sa dakbayan.

Sa press conference gipasabot ni Radaza nga iyang gisalindot ang maong mga taho nga gipagawas sanglit wala man siya kadawat sa maong kasayuran gikan sa kapolisan.

Giawhag hinoon ni Radaza ang kapolisan sa pagsusi sa maong taho.

Dugang ni Radaza nga iya sab giawhag ang mga molupyo sa kabarangayan sa dakbayan ingon man ang mga opisyal sa barangay sa pagtaho ngadto sa kapolisan kun makamatikod kini sa katingalahang mga lihok sa grupo sa mga tawo sa ilang dapit.

Higpit nga nagbantay karon ang kapolisan sa Dakbayan sa Lapu-Lapu alang sa pagpatunhay sa kahapsay ug kalinaw sa dakbayan nunot sab sa pagsaulog sa tinuig nga kapistahan karong Nobiyembre 20 ug 21.

Si Senior Superintendent Lemuel Obon, direktor sa Lapu-Lapu City Police Office, niingon nga tinguha nila ang tinuig nga pangilin nga hingpit gayud nga malinawon. (/GMR)(BANAT NEWS)