Lolo nadasmagan sa bus patay
CEBU, Philippines – Patay ang usa ka lolo human kini nadasmagi og Ceres bus diha sa national highway sa Barangay El Pardo, Lungsod sa Boljoon niadtong Martes sa hapon.
Ang biktima mao si Julio Sesuelos, minyo, 70-anyos residente sa maong lugar patay na nga naabot sa tambalanan tungod sa grabeng kadaot sa iyang lawas nga iyang naangkon.
Ang drayber mao si Malbin Romano, 52-anyos, minyo, taga Barangay Tungkil, Lungsod sa Minglanilla.
Human sa maong hitabo, ang kapolisan sa lungsod nakadawat og report gikan sa usa ka Joe Medulla kabahin sa maong insidente.
Daling miresponde ang mga polis apan wala na nila maabti ang biktima diha sa lugar nga nahitaboan tungod kay dali kining gidala ngadto sa tambalanan.
Base sa imbestigasyon sa kapolisan ang biktima nagmaneho og traysikol padulong sa Lungsod sa Santander ug pag-abot sa maong lugar si Sesuelos nikanaog sa traysikol ug kalit lang kining nilabang nga walay lingi-lingi.
Giingong si Romano nisuway sa paglikay kang Sesuelos apan naabtan gyud kini hinungdan nga maayong pagkabunal sa biktima diha sa karsada. -/BDB (BANAT NEWS)
- Latest