Drayber sa habal-habal gipusil patay
CEBU, Philippines – Patay diha-diha ang 49-anyos nga drayber sa habal-habal human pusila sa wala mailhing mamumuno niadtong Martes sa gabii diha sa dalan Gil Tudtud, Barangay Mabolo, Dakbayan sa Sugbo.
Ang biktima mao si Flaviano Cabatas Abay, residente sa Sitio City Central, Barangay Luz, sa maong dakbayan kinsa niadtong higayona naghatud og pasahero.
Si Police Senior Inspector Janielito Marquez, deputy chief sa Mabolo Police Station nagkanayon nga human nanaog ang pasahero sa biktima kalit lang kining gipusil.
Si Abay nakaangkon og mga samad pinusilan sa nagkadaiyang parti sa iyang lawas.
Nakuha sa mga polis gikan sa lugar nga nahitaboan ang tulo ka kabhang sa kalibre .45 nga bala.
Si Marquez nagkanayon nga posibleng gisundan ang biktima sa mamumuno, matud ni Marquez.
Gibutyag ni Marquez nga ang igsuon sa biktima natahap nga ang iyang igsuon nasaypan kining asset sa mga polis.
Ang kapolisan aduna nay gipanid-an nga person of interest sa maong hitabo. -/BDB (BANAT NEWS)
- Latest