Balay sa konsehal gisuwayan pagsunog

CEBU, Philippines – Gisilaban sa mga wala pa mailhing tawo kinsa sakay og motorsiklo ang panimalay ni kanhi barangay kapitan ug karon Konsehal Jessielou Cadungog sa Tejero, Dakbayan sa Sugbo kagahapon sa kaadlawon.

Hinoon dali ra napawong sa mga silingan ug ang duha ka compressor sa air conditioner ang nasunog. Nasuta sa kabomberohan nga gasolina ang sulod sa botelya sa tubig nga gipang-itsa sa balay ni Cadungog.

Base sa kuha sa closed circuit television (CCTV) camera, adunay duha ka motorsiklo nga adunay tagsa-tagsa ka angkas ang nihunong sa atubangan sa balay diin ang unang angkas adunay giitsa nga mga botelya ngadto sa balay.

Ang angkas sab sa ikaduhang motorsiklo ang nagduslit ug giitsa ngadto sa gitagakan sa mga botelya. Dili maklaro ang panagway sa mga tawo nga nihimo sa krimen ingon nga nagtaptap sab kini sa ilang mga panagway.

Adunay silingan nga nakamatikod nga sa wala pa ang insidente, dunay nag-motor nga daw sa may gisusi sa lugar.

Daku ang ilang pagtuo nga ang nagsunod nga nag-angkasay sab og motorsiklo nga makita usab sa CCTV ang kauban sa grupo.

Si Cadungog ug ang iyang drayber nga si William Macaslang unang nalambigit sa pagpamusil sa may T. Padilla Extension eskina sa Alviola Street, Barangay Tejero diin giingong suway sila nga gibanhigan apan naunhan sa drayber ang suspek ug napatay kinsa nailhan nga si Police Officer 3 Eugene Calumba.

Apan ang hepe sa Waterfront Police Station nga si Police Senior Inspector Joemar Pomarejos nihimakak nga polis ang adunay kalabutan sa suway nga pagsunog sa balay.

Nahibulong sab sila nga mokooperar man gyud unta ang barangay kanila apan niadtong higayuna wala kini nitaho kanila sa insidente.

“Mas maayo unta kung gisumbong nila dayon para ma-hot pursuit nato, magpahigayon ta og checkpoint para madakpan unta to nato,” si Pomarejos nagkanayon.

Alas 2:09 sa kaadlawon kagahapon nadawat sa kabomberohan ang alarma ug alas 2:12 niana napawong dayon ang kayo apan giingong alas 3 sa kaadlawon na nahibaw-an sa kapolisan. Matud ni Cebu City Fire Marshall, Chief Inspector Noel Nelson Ababon, nga arson maoy gitutukan nila nga motibo sa suway nga pagpanunog sa panimalay ni Cadungog.

Gibutyag ni Ababon nga nagpadala na sila og imbitasyon sa mga saksi nga ilang gihuptan alang sa dugang imbestigasyon.

Si Konsehal Margarita Osmeña nagtuo nga gituyo ang maong insidente.

Iya na sab gipahibawo si Mayor Tomas Osmeña labot sa insidente kinsa tua pa sa Yokohama, Japan nitambong Smart Cities Conference.

Si Tejero Barangay Kapitan Hermogenes Galang kinsa nagpatawag og press conference human sa insidente nasurpresa sa insidente ug wala kini gidudahan kun kinsa ang nihimo niini.

Sigun sa kapitan nga wala na siya’y komunikasyon ni Cadungog kinsa ni-leave og unom ka buwan human nga naabswelto kini sa kaso nga iyang giatubang kaniadto.

Kini nitataw nga paningkamutan nila sa barangay nga mawala ang kabalaka nga gibati sa mga residente sa dapit.

Dili sab kini kasulti kun ang suway nga pagsunog sa balay ni Cadungog duna bay kalambigitan sa nahitabo sa konsehal nga gisuwayan sa pagbanhig. - Rowena D. Capistrano ug Decemay P. Padilla/GMR (BANAT NEWS)