Nitago ra diay

CEBU, Philippines — Wala dagita o gipasipad-an og laing tawo ang na-missing nga Sangguniang Kabataan Chairman sa Barangay Tigbao sa Badian kondili nitago ra kini sa Lungsod sa Boljoon tungod sa iyang problema.

Si Reynell Magalzo Cantilla, 18-anyos nawala sud sa tulo ka adlaw human wala na nakauli niadtong Huwebes sa gabii (Nobiyembre 8) gikan nagpahilot didto sa balay sa iyang amigo.

Wa na siya makita pag-usab sa iyang mga ginikanan ug ang motorsiklo niini nalang ang napalgan nga natumba na duol sa sa usa ka taytayan sa maong lungsod.

Nabalaka ang ginikanan niini ug nagpatabang sa kapolisan tungod kay nakadawat sila og text gikan niini nga nag-ingong: “Taynay bang” nga gituohan nilang kini nagpatabang.

Matud pa ni Senior Police Officer 1 Melvin Cullados, Desk Officer sa Badian Police Station may mitawag kanila niadtong Domingo sa gabii ug nipahibalong nakita-an si Cantilla sa Barangay Calomboyan sa Lungsod sa Boljoon.

Dali nga gisubay sa grupo nila ni Senior Police Officer 1 Josefina Beriarmente uban ang mga ginikanan ni Cantilla ang lugar ug didto nakit-an ang maong SK chairman.

Sumala pa ni Cullados, nasabutan sa pamilya nga dad-on usa ngadto sa balay sa uyoan didto sa lungsod sa Oslob si Cantilla.

Matud pa nga nitug-an kini nga aduna kini giluom nga problema nga wala niini ibutyag sa kapolisan kay sila ra sa ilang pamilya ang magsabotsabot.

Ang hepe sa kapolisan sa Badian nga si Police Inspector Elmond John Mondaya nakigkita sa maong batan-on didto sa Oslob. Gitambagan ang pamilya nga ipahiling sa doktor si Cantilla. (BANAT NEWS)