Drug den sa Talisay nabulabog
Gabriel Bonjoc, Romeo T. Limpangog, Camille Pateres (Banat) - November 12, 2018 - 12:00am

CEBU, Philippines — Nabulabog ang usa ka drug den sa Sitio Tiago, Barangay San Isidro, Dakbayan sa Talisay ug nadakpan ang giingong nagpadagan niini ug ingon man ang mga gipasanginlang nanuyop sa sulod niini niadtong Sabado sa hapon.

Gironda sa mga operatiba sa Philippine Drug Enforcement Agency-7 ang barong-barong nga giingong gihimong drug den ni Franklin Rafols, kinsang gitumbok nga usa sab ka drug pusher.

Giingong gipahigayonan og buy bust operation si Rafols,  kinsa usa ka newly identified nga drug pusher ug drug den maintainer.

Lakip sa gidakop ang gituohang mga parokyano niini nga mibisita sa maong drug den nga silang Raymond Labra; Jone Ryan Nacario; Christopher Ledona; Stewart Calinpusan; Michael Jay Bayaga ug si Mark Anthony Nacario.

Nasakmit gikan sa mga dinakpan ang mga drug paraphernalia ug siyam ka mga pakete sa gituohang shabu nga motimbang og 15 ka gramo ug mobalor na ngadto sa P102 mil.

Ang  tigpamaba sa PDEA-7 nga si Leia Albiar mibutyag nga adunay misumbong nga mga residente kabahin sa illegal nga negosyo ni Rafols diha sa ilang dapit.

Matud pa nga nakuyawan ang mga silingan niini sanglit bisan kinsa na lang ang mosulod ug mogawas sa maong barong-barong ug daw walay gipili nga oras.

“Naay report sa mga silingan nga makabantay sila nga lahi-lahi na nga tawo ang manganha bisa’g gabiing dako. Wala na sila kaila sa uban,” si Albiar miingon.

Sa gipahigayong surveillance sa mga operatiba sa PDEA- 7 sulod sa usa ka semana nakompirmar nila nga tinuod ang maong taho.

“Mga drayber sa sikad, habal-habal drayber ug mga construction workers kasagarang mamalit niya,” butyag sa maong tigpamaba.

Pasakaan og kasong pagpayuhot og shabu ug pagmentinar og drug den si Rafols samtang possession of illegal drugs ug visiting drug den ang mga kasong atubangon sa mga naabtan sa maong drug den.

Sa laing operasyon, kapin tunga sa milyon ka pesos nga kantidad sa drugas ang nasakmit sa mga operatiba sa managlahing barangay sa Dakbayan sa Talisay nga gihimo sa mga sakop sa Provincial Intelligence Branch (PIB) sa Cebu Provincial Police Office (CPPO).

Unang gironda ang Sitio Long Dream, Barangay Bulacao mga alas 2 sa hapon niadtong Sabado.

Nakuha gyud sa mga operatiba ang subject nga si Leo Carlo Cortes, 25, nga taga Barangay Biasong sa nahisgutang siyudad.

Lakip sa nadakpan mao ang iyang mga kaubanan nga sila si Margeline Labay, 20; James Radana, 24; ug upat ka mga menor de edad.

Nakuhaan sila og 11 ka medium nga pakete, 13 ka gagmay nga pakete sa shabu, usa ka .45 nga pusil nga aduna’y 15 ka mga bala, KG-9 nga adunay walo ka bala, timbangan, bullet proof vest ug drug paraphernalia.

Ang shabu nga nakuha gikan kanila nitimbang og 55.52 gramos nga aduna’ balor nga P655,136 mil.

Kagahapon sa alas 6:30 sa buntag, nasikop sab sa kapulisan sa Siyudad sa Talisay ang gisumbong nga tigpayuhot og ilegal nga drugas sa Sitio Tigib, Barangay Lagtang nga si Rolando Callino alyas Tambok, 29.

Nakuhaan siya og 65 ka gagmay ug tulo ka medium nga pakite sa shabu nga gibanabanang mokantidad og P72,452 mil.

Sa Lungsod sa Compostela, nadakpan ang amahan ug anak niini sa buy bust  operation kagahapon sa buntag.

Si Police   Senior Inspector Jade  Sumugat  sa Compostela  Police    Station  miila sa mga  nadakpa mao sila si Rolando Quinay  Bataluna Sr., 45, ug anak nga si Rolando Jr.  parehong nagpuyo sa maong  dapit.

Matud  pa ni  Sumugat napalitan ang duha og P500 nga shabu hinungdan sa ilang pagkasikop. Nakuha gikan kanila ang dugang unom ka paketeng gidudahang shabu ug ang buy bust money. (BANAT NEWS)

GIPASANGINLANG NANUYOP
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with