Tulo nasignit sa naglakaw-lakaw nga mga polis
CEBU, Philippines – Duha ka adis-adis ug usa ka armadong lalaki ang nadakpan sa mga sakop sa Regional Mobile Force Batallion (RMFB-7) sa Barangay Tangke, Dakbayan sa Talisay niadtong Huwebes sa buntag.
Unang nasikop mao si Redwin Daan, 30-anyos, ulitawo, sa Sitio Kilawan, Barangay Tangke sa maong siyudad mga alas 2:30 sa kaadlawon.
Ang grupo nila ni Insp. Clifton Gairanod nagpahigayon og foot patrol sa lugar sa dihang nakit-an si Daan nga kadudahan ang lihok nga nagbagal ang kilid.
Sa ilang pagsita nakit-an ang .9mm nga pusil sa suspek nga adunay pito ka bala.
Samtang mga alas 11 sa buntag nasikop sab sa kapolisan sila si Robert Alonzo, 24-anyos, ulitawo nga taga Sitio Tabukanal, Pardo, Siyudad sa Sugbo ug si Joselito Larumbre, 45-anyos, ulitawo nga taga Ward 4, Lungsod sa Minglanilla.
Pinaagi sa paglakaw-lakaw sa mga awtoridad sa lugar ilang nasikop si Alonzo nga nakuhaan og upat ka gagmay nga pakete sa shabu samtang tulo ka gagmay nga pakete sa shabu gikan ni Larumbre.
Ang mga dinakpan gidala sa Talisay City Police Station ug gitanggong sa bilanggoan. (/GMR)(BANAT NEWS)
- Latest
