Nagtong-it gironda, tulo ka sugarol sikop

CEBU, Philippines – Gitanggong sa selda sa kapolisan sa Lungsod sa Cordova ang tulo ka tawo nga ilang naaktohan nga nagduwa og ilegal nga sugal nga tong-it ug nasakmitan sab og pinaketeng shabu.

Si Senior Inspector Efren Diaz Jr., hepe sa Cordova Police Station, niila sa ilang nadakpan nga sila si Jimbell Piesas Francia, 21; Miguel Tirol Casquejo, 19, ug Rondel Sadrejas Diagon, 19, pulos taga Purok Sambag, Barangay Buagsong, Lungsod sa Cordova. Ang kapolisan sa Cordova Police Station ang nakadawat og mga taho labot sa grupo sa mga tawo nga nagpahigayon og ilegal nga sugal sa nahisgutang dapit nga maoy hinungdan nga gihimo ang kinalit nga pagpangronda.

Sa mao nga pagpangronda ang pipila nga mga kauban nga nagtapok nga niapil sa maong ilegal nga sugal nga tong-it ang nakamatikod dihang nahidangat ang mga polis nga maoy hinungdan nga nag-iyahay kini og panagan pahilayo sa paglikay nga madakpan sa kapolisan.

Ang tulo nga wala dayon nakalihok sa ilang gilingkuran ang nagunitan sa mga polis nga maoy hinungdan sa ilang pagkasikop.

Dihang gihimo ang pagrekisa sa ilang kalawasan maoy nakuha sa kapolisan ang lima ka gagmay nga pakete sa gituohang shabu nga nalakip sa ebidensiya sa kaso nga ilang ipasaka. (/GMR)(BANAT NEWS)