Drug den sa hotels?

CEBU, Philippines – Mga shabu nga nasakmit diri sa Dakbayan sa Sugbo ning bag-ohay lang gibaligya gikan sa mga hotels ug gidudahang kabahin kini sa mga nakalusot nga shabu gikan sa kaulohan sigun pa sa direktor sa Cebu City Police Office nga si Police Senior Supt. Royina Garma.

Niadtong Miyerkules sa kaadlawon duh aka grupo sa mga namaligya og ilegal nga drugas ang nangadakpan sa operasyon diha sa duha ka mga baratuhong hotel sa dakbayan. Nagduda si Garma nga ang mga nasakmit nga shabu gikan pa sa Manila base sa hitsura niini. “It has something to do with the drugs na nailusot sa Manila because kung titingnan mo ‘yung quality it’s similar to the quality, and the color ng substance. That is according sa friend ko na police operative sa Manila,” si Garma miingon atol sa media briefing kagahapon.

Gibana-bana nga mobalor ngadto sa P2,800,000 ang nasakmit nga shabu gikan sa mga dinakpan sa didto sa usa ka hotel sa Barangay Capitol Site, Dakbayan sa Sugbo kagahapon sa kaadlawon.

Ang mga dinakpan giila nga silang Mary Jane Dequitos 36, residente sa Villa Gonzalo; Jhonfri Tapales 18; ug si Geramae Niala. Nakuha gikan sa maong grupo ang siyam ka bulto ug tulo ka medium nga pakete sa gituohang shabu diin adunay gibugatong 240 ka gramo.

Ang hepe sa Abellana Police Station nga si Senior Inspector Eduard Sanchez nagkanayon nga unang nasakpan sa nag-roving nga polis si Niala nga mitunol og shabu sa usa ka langyaw nga nagbarog-barog ra sa maong lugar. Sa pagkadakop ni Niala, giingong gitug-an niini ang gihimutangan sa iyang tinubdan nga si Dequitos, kinsa ni-check in sa maong hotel sugod niadtong Miyerkules. Ubos sa pagtugot sa tagdumala sa hotel gipahigayon ang buy bust operation batok ni Dequitos pinaagi ni Niala.

 Butyag sa maong hepe nga si Niala gyud ang pusher ni Dequitos samtang si Tapales mao ang tigbahig sa mga shabu nga baligya ni Dequitos diha sa ilang giabangang lawak. Matud pa diha usab pick apon sa mga pushers ni Dequitos ang drugas niini.

“Nagduda na gyud ang gwardya kay daghan kaayo mo saka kanaog sa kwarto ani nila. Bisan gabii na kaayo mohangyo gyud nga mosaka kay kadali ra daw sila,” miingon ang maong hepe. Gikataho ni Sanchez nga makabaligya si Dequitos og tagsa ka kilo nga shabu matag semana diin mga langyaw ang target niini nga baligyaan sanglit mamahimo nilang taasan ang presyo. Wala motug-an si Dequitos kun diin gikan ang iyang supply sa shabu apan gisubay kun aduna bay kalambigitan ang bana niini nga napriso karon sa Cebu City Jail kinsa nadakpan sab sa buy bust operation karong tuiga. Apan gihimakak sa mga dinakpan ang maong mga pasangil. Si Tapales miingon nga igo ra siyang naghatod og pagkaon sa iyang uyab sa dapit ug kalit lang siya nga gidakop.

Samtang, niadtong Miyerkules sa hapon, nadakpan sulod sab sa usa ka hotel sa barangay Lahug ang 35 anyos nga si Ian Paul Bontilao Cabarrubias, lumulupyo sa barangay Bacayan, Dakbayan sa Sugbo. Si Cabarrubias nakuhaan og P295 mil nga balor sa gidudahang illegal nga drugas ug usa ka paltik nga kalibre .22 revolver.

Ang upat lakip lang sa 28 ka mga nadakpan sa operasyon sugod alas -2 sa kaadlawon niadtong Miyerkules nga miresulta sa pagkasakmit sa P5.2 milyones nga shabu.

Si Garma, sa iyang bahin nagkanayon nga nagpasabot lang kini nga daghan gihapong shabu sa Sugbo. “Sa negosyo magbebenta ka ba kung hindi mabenta? Ganun yun eh. Mabebenta kaya may nagbebenta. Kaya may nagbebenta kasi maraming bumibili and who doesn’t want money?” dugang sa maong direktor. (/IBM)(BANAT NEWS)