Lima nasikop sa kapolisan sa Daanbantayan

CEBU, Philippines – Gibalhog karon sa bilanggoan sa Daanbantayan Police Station ang lima ka gidudahang pusher og shabu nga nadakpan sa gihingusgan nga buy-bust operation sa kapolisan sa managlahing takna ug lugar sa nahisgotang lungsod nunot usab sa ilang gipasiugdahang programa nga “Isumbong Mo Kay Hepe ” nga ubos sa pagdumala ni Police Senior Inspector Adrian Nalua.

Sa Sitio Camaras, Brgy. Bateria, gialarmahan sa kapolisan ang usa ka tawo nga armado nga miresulta sa pagkasikop ni Tereso Umpad Monares ug Rowel Monin Monares nga pulos hingkod ang panuigon ug nagpuyo sa maong dapit.

Nunot sa ilang pagkasikop, nasakmit sa kapolisan ang kalibre 357 nga pistol nga adunay bala ug ingon man usa ka kalibre 38 nga adunay gihapoy mga bala.

Nadakpan usab ang gikatahapang pusher og shabu nga si Crisologo Gastador Abenasa, 44-anyos nga nagpuyo sa Brgy. Bateria.

Nakuhaan kini og lima ka gagmayng pakete sa gituohang shabu dihang girekisa ang kalawasan sa dinakpan human sa ilang buy-bust operation.

Samtang sa Anti-illegal Gambling operation sa Sitio Camaras, Brgy. Bateria, nadakpan sila si Jonel Umpad Cañete ug Jory  Abenasa Adolfo nga pulos hingkod ang panuigon ug nagpuyo sa maong dapit. (/DILT)(BANAT NEWS)