Snatcher, tulisan sikop

CEBU, Philippines – Nasikop ang snatcher ug tulisan sa pagpatrolya sa kapolisan sa Parian Police Station sa Dakbayan sa Sugbo.

Unang nasikop mao ang giingong snatcher sa may Osmeña Blvd., Kamagayan mao si Daryl Aldava, 19, taga Barangay Cogon Ramos, kinsa nibiktima sa usa ka Meylord Datay, 21, dalaga, taga Sitio Arco, Barangay Lahug pinaagi sa paglabni sa iyang cellphone samtang naghunong ang gisakyan niini.

Matud ni Senior Police Officer 1 Julito Elarcosa nga daling nakapangayo og tabang si Datay sa mga istambay kinsa dali sab nga nakatawag kang Police Officer 1 Joie Garciano nga anaa sa maong lugar hinungdan sa pagkasikop sa suspek.

Samtang usa sab ka tulisan nga si Ronnel Lauron ang nasikop alas 3 pasado sa kaadlawon sa may dalan P. del Rosario, Kamagayan, ug nakaeskapo ang duha ka kauban human nila gibiktima ang usa ka Edmark Servan, 34, taga Barangay Day-as. Naglakaw ang biktima dihang kalit giduol ni Lauron ug kaubanan dayon tion sa iyang bitbit nga kutsilyo.

Gumikan sa kahadlok nahatag sa biktima ang backpack diin sulod ang sapatos ug kwarta apan dali nga nakadagan ang biktima sa mga nag-roving nga barangay tanod sa San Antonio kinsa maoy nakatawag sa kapolisan nga niresulta sa pagkasikop ni Lauron.

Narekober gikan kang Lauron ang P500 ug 10 Singaporean Dollar ug pipila ka sinsilyo nga iya ni Servan. (/GMR)(BANAT NEWS)