Duha ka giingong nangawat sikop
CEBU, Philippines — Nasikop sa nilabay’ng adlaw ang manag-agaw nga giingong mga kawatan human sila gipasanginlang nangawat sa mga gamit sa konsehal sa Barangay Mohon, Dakbayan sa Talisay.
Ang biktima mao si Konsehal Val Yonto sa maong barangay ug ang mga suspetsado mao sila si Rodilito Batiller, 23-anyos ug si Fernan Regay, 23, pulos nagpuyo sa maong dapit.
Sa imbestigasyon sa kapolisan nasuta nga adunay gipagama nga apartment si Yonto diha sa maong lugar ug giingong gipangkuha sa duha ka suspetsado ang electrical service wire ug submersible water pump.
Samtang nagbitbit ang duha sa maong mga butang gitawag sa mga residente sa lugar ang mga barangay tanod nga sila si Dionesio Delos Reyes, Lester Deiparine ug si Antonio Pabonita.
Ang duha daling gisikop sa maong mga tanod ug giturn-over ngadto sa mga polis sa siyudad. (BANAT NEWS)
- Latest