Pito nalambigit sa ilegal nga drugas dili makapiyansa
CEBU, Philippines — Pito ka tawo ang nag-atubang og kaso tungod sa giingong paghupot nila og transparent sachet nga giingong dunay traces a shabu atol sa ilang social gatherings duha ka semana ang nilabay.
Sila si Carlito Jabonillo, Efrel Casas, Kirt Badayos, Glory Jun Lunop, Felrose Ocampo, Jeffrey Lunop ug Antonio Lopez, Jr. nag-atubang og kasong kalapasan sa Section 13, Article II sa Akta Republika 9165 kun “Comprehensive Dangerous Drugs Act”.
Giingong ang korte wala motugot nga makabutang og piyansa alang sa ilang temporaryong kagawasan ang mga suspetsado.
Matud sa mga sakop sa Philippine Drug Enforcement Agency (PDEA)-7 nga niadtong Septiyembre 25, 2018 nakadawat sila og taho kabahin ni Jaime Geraldo nga giingong nalambigit sa pagpamaligya og ilegal nga drugas ug giingong nagmentenar usab kini og drug den diha sa iyang balay sa Sitio Catwalk, Barangay Duljo Fatima, Dakbayan sa Sugbo.
Niadtong Oktubre 7, 2018, ang PDEA nagpahigayon og operasyon batok kang Geraldo human sila nakadawat og taho nga giingong ang suspetsado duna kini bag-ong stocks sa shabu.
Atol sa maong operason giingong naabtan sa PDEA ang nahisgutang pito ka suspetsado nga naghingos og shabu. Ang pito lakip si Geraldo daling gisikop sa mga sakop sa PDEA.
Sa gipahigayong inquest proceeding, ang pito nagkanayon nga atubangon nila ang kaso ngadto sa korte ug dili sila mosumitir og counter-affidavit ngadto sa piskaliya.
Ang maong kaso batok sa pito ka suspetsado ang gipasaka ngadto sa korte tungod kay nakita sa piskaliya nga aduna kini igong basehan. (BANAT NEWS)
- Latest
