Pagpananum og mais nalangan
CEBU, Philippines — Nabalaka ang mga mag-uuma sa Probinsiya sa Sugbo tungod sa minus nga ulan sa niaging buwan ug sa pag-usab-usab sa dagan sa panahon.
Ang local weather station sa Mactan hinoon nakarehistro og nihit nga ulan sa buwan sa Hulyo ug Agosto samtang adunay hulga sa El Niño phenomenon.
Si Lilia Yanong, tigpamaba sa Kilusang Magbubukid ng Pilipinas (KMP)-Cebu, nidason nga ang mga corn farmers nireklamo na tungod sa kakulangan sa ulan nga nakabalda sa tingtanum sa mais.
“Grabe kadaku sa deperensya karon. Lahi na gyud ang panahon. Tingtanum man unta niadtong Septiyembre pero kulang man ang ulan maong nausab hinoon,” matud niya sa Banat News.
Kasagarang mag-uuma nga naapektuhan gikan sa habagatang dapit sama sa Aloguinsan, Toledo City, Pinamungajan, Balamban, Asturias, ug uban pa.
Lakip sa apektado ang mga tigtanum og mga utanon.
Si Yanong niingon nga ang ilang grupo nihangyo sa lokal nga pangagamhanan sa Subgo ug ubang ahensya sa gobiyerno sama sa Department of Agriculture nga tabangan sila sama sa binhi ug irigasyon.
Si Romeo Aguirre, weather specialist sa Philippine Atmospheric, Geophysical and Astronomical Services Administration (PAGASA) sa Lapu-Lapu City Station, nagkanayon nga adunay 30 porsyento nga rainfall deficit sa buwan sa Hulyo ug 70 porsyento sa Agosto.
Karong buwana nakuha sa probinsiya ang gipaabot nga gidaghanon sa ulan tungod kay niadto lang Sabado, nibunok pag-ayo ang ulan sa Metro Cebu.
Si Aguirre nipahimangno pag-usab nga wala pa gilibkas sa PAGASA ang posibilidad nga magsugod ang El Niño sa dili pa matapos ang tuig. (BANAT NEWS)
- Latest