Ihawanan sa kalungsuran palambuon sa PVO

CEBU, Philippines — Moabot ngadto P36 milyones ang gipangayo nga pundo sa Provincial Veterinary Office (PVO) alang operations niini alang sa tuig 2019.

Wa pay labot niini ang gipangayo nga P49 milyones sa maong buhatan alang sa development projects sama sa pagtukod og slaughter house o ihawan, pagpalambo sa livestock markets ug pagtukod og bag-ong public veterinary clinic. Matod ni Dr. Mary Rose Vincoy, hepe sa PVO nga ila pa lang karon gi-identify kun asa nga lungsod magtukod og "Doube A" nga slaughterhouse o ihawan.

Ang Double A nga klase sa ihawan, sumala sa National Meat Inspection Service (NMIS) mao ang pasilidad nga ang operasyon niini igo alang sa mga hayopan nga ihawon nga mahimong ibaligya sa kamerkadohan.

Matod niya nga apil usab sa ilang gastohan sunod tuig ang pagtabang sa LGUs nga adunay mga ihawan nga gipasirad-an sa Department of Environment and Natural Resources (DENR) kay wala maka-comply sa rekisitos nga gikinahanglan.

Ang PVO nagplano usab nga magtukod og laing vetirinary clinic sa habagatang bahin sa Sugbo. Kini human nga nakapatukod na sila og clinic sa Lungsod sa Tudela.

Ang maong clinic magsilbi nga satellite office sa PVO ug ingon man buhatan kun asa mahimong makapangayo og permit ang mga tawo nga gusting ibyahe ang ilang mga hayop gawas sa Probinsiya sa Sugbo. (/DILT)(BANATNEWS)