Centennial image sa Birhen sa Fatima nibisita

CEBU, Philippines — Gatusan ka layko ug sakop sa World Apostolate of Fatima gikan sa nagkadaiyang parokya sa Archdiocese of Cebu ang nitambong sa mga kalihukan sa pagbisita sa centennial image sa Birhen sa Fatima gikan sa Fatima Portugal.

Kagahapon sa buntag usa ka pilgrim ang gihimo diin ang centennial image sa Birhen sa Fatima gidala diha sa mga parokya sa Madridejos, Santa Fe ug uban pa alang sa paghatag sa kahigayon sa mga magtutuo nga makayukbo sa mahal nga birhen.

Human sa pagtuyok sa mahal nga birhen diha sa mga parokya sa isla gibalik kini diha sa St. Peter and Paul Parish sa Isla sa Bantayan diin gipadayon ang mga kalihukan.

Lakip sa mga kalihukan mao ang pagpasabot kalabutan sa pamilya ug ang rosaryo ni Monsignor Ruben Labajo, spiritual director sa World Apostolate of Fatima ug WAF Central Visayas regional director.

Matud ni Labajo nga ang buwan sa Oktubre gitawag og “month of the holy rosary” tungod sa kadaugan sa mga Kristiyano batok sa mga Moros didto sa Lepanto niadtong Oktubre 7, 1571 ug niawhag ang Santo Papa sa katawhan sa pagrosaryo sa mahal nga birhen. (/BDB)(BANATNEWS)